QHR áskeriniń joǵary shendi generaldarynyń ústinen is qozǵaldy
ASTANA. KAZINFORM — QKP OK Saıası bıýrosynyń múshesi, Ortalyq áskerı keńestiń tóraǵasynyń orynbasary Chjan ıÝsııanyń ústinen is qozǵaldy. Bul týraly QHR Qorǵanys mınıstrliginiń resmı ókili málimdedi.
Qytaı Qorǵanys mınıstrliginiń resmı ókili, polkovnık Tszıan Bın 24 qańtar kúni ótken baspasóz maslıhatynda QKP OK Saıası bıýrosynyń múshesi, Ortalyq áskerı keńes tóraǵasynyń orynbasary Chjan ıÝsıa men QKP OK múshesi, Ortalyq áskerı keńes Birlesken shtabynyń bastyǵy Lıý Chjenlıdiń tártip pen zańdy óreskel buzǵany úshin QKP OK-niń sheshimimen tergeýge alynǵanyn habarlady.
RFI-diń deregi boıynsha, QHR Tóraǵasy Sı Tszınpın basqaratyn Ortalyq áskerı keńes – Qytaıdaǵy eń joǵary áskerı organ. Ol kompartııanyń áskerge absolıýtti basshylyǵyn qamtamasyz etýge jáne ulttyq qorǵanys máselelerin úılestirýge jaýapty.
Qazirgi kúnde Ortalyq áskerı keńestiń tóraǵasynyń eki orynbasary bar. Áskerı tájirıbesi men saıası salmaǵyna oraı Chjan ıÝsıa ásker júıesindegi eń yqpaldy tulǵalardyń biri retinde baǵalanady. Al tóraǵanyń kelesi orynbasary Chjan Shenmın bul qyzmetke byltyrǵy qazan aıynda ǵana taǵaıyndalǵan.
Agenttiktiń málimetinshe, 2012 jyly Sı Tszınpınniń bastamasymen sybaılas jemqorlyqqa qarsy aýqymdy naýqan bastalyp, ásker salasy kúrestiń negizgi salalarynyń birine aınaldy. 2023 jyly naýqan áskerı basshylyqtyń joǵarǵy eshelonyna deıin jetip, ásirese Zymyran kúshteri qatań tazalaýǵa ushyrady.
2025 jyldyń qazan aıynda, Ortalyq áskerı keńes tóraǵasynyń sol kezdegi ekinshi orynbasary He Veıdýn men segiz joǵary shendi general sybaılas jemqorlyq aıyptary boıynsha Kommýnıstik partııanyń qatarynan shyǵarylǵan bolatyn.
Ashyq derekkózderge sáıkes, Chjan ıÝsıa bıyl 76 jasta. Ol 18 jasynda ásker qataryna shaqyrylyp, 1979 jyly Qytaı–Vetnam soǵysyna qatysqan. 2012 jyly Qytaı Halyq-azattyq armııasynyń Bas jabdyqtaý basqarmasynyń bastyǵy qyzmetine taǵaıyndaldy. 2017 jyly QKP-nyń XIX sezinde Saıası bıýronyń múshesi, Ortalyq áskerı keńestiń tóraǵasynyń orynbasary bolyp saılandy, 2022 jylǵy QKP-nyń XX sezinde aıtylǵan laýazymdarǵa qaıta saılandy. Onyń ákesi – QHR-nyń irgesin qalasqan general Chjan Tszýnsıýn.
Lıý Chjenlı bıyl 62 jasta. Ol 1983 jyly áskerge alynyp, 1986 jyly Qytaı–Vetnam shekarasyndaǵy áskerı qaqtyǵystarǵa qatysqan jáne jaýyngerlik erligi úshin birinshi dárejeli eńbek jazylǵan. 2015 jyldyń sońynda Lıý Chjenlı qaıta jasaqtalǵan Qytaı Halyqtyq-azattyq armııasy Qurlyq kúshteriniń alǵashqy shtab bastyǵy bolyp taǵaıyndaldy. 2021 jyldyń maýsymynda Qurlyq kúshteriniń qolbasshysy qyzmetine kóterilip, eneral-polkovnık shenin aldy.
Osyǵan dıin Qytaıda aqshany jylystatýǵa qarsy kúresti kúsheıtýge arnalǵan qujat qabyldanǵany týraly jazdyq.