QHR AQSh-tan qytaılyq stýdentter men ǵalymdarǵa qysym jasaýdy toqtatýdy talap etti
ASTANA. KAZINFORM — Qytaıdyń Syrtqy ister mınıstrligi dúısenbi kúni AQSh-ty kinásizdik prezýmptsııasyn saqtaýǵa jáne saıası astarmen áreket etýdi toqtatýǵa shaqyrdy, dep habarlaıdy Sınhýa.
Bul rette AQSh-ta júrgen qytaılyq stýdentter men ǵalymdarǵa qatysty saıası sebeptermen jáne kemsitýshilik sıpatta zań qoldaný áreketterin toqtatýǵa úndedi.
Qytaıdyń Syrtqy ister mınıstrliginiń resmı ókili Go Tszıakýn bul málimdemeni mınıstrliktiń kezekti baspasóz máslıhatynda jýrnalısterdiń taǵy bir qytaılyq ǵalymnyń AQSh quqyq qorǵaý organdary tarapynan esh negizsiz tutqyndalýyna qatysty pikir suraýyna jaýap retinde jasady.
Onyń aıtýynsha, belgili bir ýaqyttan beri AQSh ulttyq qaýipsizdik tujyrymdamasyn keńeıtip, elde júrgen kóptegen qytaılyq stýdent pen zertteýshilerdi qýdalaýǵa, tergeýge, tipti eshqandaı negizsiz tutqyndap, aıyp taǵýǵa jıi jol bergen.
— Bul jaǵdaılar qytaılyq stýdentter men ǵalymdardyń zańdy quqyqtary men múddelerin eleýli túrde buzdy. Sondaı-aq Qytaı men AQSh arasyndaǵy gýmanıtarlyq baılanystarǵa, ásirese bilim berý salasyndaǵy yntymaqtastyqqa aıtarlyqtaı kedergi keltirdi. Aqyr sońynda AQSh-tyń ımıdji men halyqaralyq bedeline nuqsan keltirdi, — dedi Go Tszıakýn.
Dıplomat AQSh-tan «kinásizdik prezýmptsııasyna» negizdelgen ádilettilik qaǵıdattaryna oralýyn, sondaı-aq saıası astarmen áreket etýdi toqtatýdy talap etti. Sonymen birge amerıkalyq basshylardyń qytaılyq stýdentterdi oqýǵa shynaıy shaqyramyz degen málimdemelerin naqty iske asyrýǵa shaqyrdy.
— Qytaı shetelde júrgen stýdentteri men ǵalymdarynyń zańdy quqyqtary men múddelerin qorǵaýdy jalǵastyrady. Sonymen qatar AQSh-ta oqyp júrgen stýdentterge múmkin bolatyn qaýip-qaterlerge saq bolýdy eskertedi, — dep túıindedi ol.
Buǵan deıin AQSh-taǵy tórt qytaılyq stýdent Donald Tramp ákimshiligin sotqa berdi. Olar AQSh úkimetiniń sheteldik stýdentterge qatysty vızany jappaı joıý áreketin zańsyz dep tanyp, ony toqtatýdy jáne stýdenttik mártebeni qalpyna keltirýdi talap etip otyr.
Osydan buryn Rýbıo AQSh qytaılyq stýdentterdiń vızasyn qaıtaryp alatynyn aıtty.