QHL: Turaqty chempıonattyń birneshe nusqasy daıyndaldy
NUR-SULTAN. QazAqparat - Qurlyqtyq hokkeı lıgasynyń jańa maýsymy 2 qyrkúıekte bastalady, dep habarlaıdy QazAqparat tilshisi lıganyń saıtyna silteme jasap.
QHL aldaǵy turaqty chempıonatty bastaýdyń birneshe kúntizbe nusqasyn daıyndady. Olardyń barlyǵy chempıonatqa qatysýshy komandalar quramyna baılanysty bolyp otyr.
Qurlyqtyq hokkeı lıgasy dırektorlar keńesiniń otyrysy osy aptada ótkiziledi. Onda jarysqa qatysatyn komandalar sany naqtylanady. Nátıjesinde jańa maýsymnyń oıyn kúntizbesi jasalady. Klýbtar men jankúıerler aldaǵy chempıonattyń oıyn kúntizbesin shilde aıynyń sońynda biletin bolady.
Tamyz aıynyń ortasynda QHL klýbtarynyń óz oıynshylaryn tirkeý merzimi bastalady. QHL turaqty chempıonaty 2 qyrkúıekte jalaýyn kóteredi.
2008 jyldan beri atalǵan jarysqa qatysyp kele jatqan qazaqstandyq «Barys» aldaǵy maýsymda baq synaı ma? Buǵan baılanysty komanda basshylyǵy ázirge naqty jaýap bergen joq.
Esterińizge sala ketelik, «Barys» oqý-jattyǵý jıynyn shilde aıynyń sońǵy onkúndiginde bastaýdy josparlaǵan bolatyn. Degenmen elimizde karantın sharalarynyń kúsheıtilýine baılanysty ol belgisiz merzimge keıinge shegerildi. Sondaı-aq, 7-11 tamyz kúnderi elordada uıymdastyrylýy josparlanǵan Prezıdent kýbogy bıyl ótpeıtin boldy.