QHL: «Torpedo» «Barystan» ese qaıtardy
ASTANA. QazAqparat - Elordalyq «Barys» qurlyqtyq hokkeı lıgasy pleı-off kezeńinde Nıjnıı Novgorodta jergilikti «Torpedo» komandasymen úshinshi kezdesýin ótkizdi, dep habarlaıdy QazAqparat tilshisi.
Esterińizge sala ketelik, alǵashqy eki kezdesý Astana qalasynda bolyp ótti. Onyń ekeýinde de bizdiń komanda jeńiske jetti. Aldymen 26 aqpanda «Barys» «Torpedony» 4:1 esebimen jeńse, 28 aqpanda bizdiń jigitter atalmysh qarsylasyn 5:4 esebimen tize búktirdi.
Alǵashqy eki kezdesýde jeńilgen «Torpedo» búgingi oıynda baryn salatyny anyq edi. Oıynnyń alǵashqy mınýttarynan sondaı jigerli qımyl kórsetýge tyrysty. Degenmen oǵan «Barys» jigitteri de tegeýrindi qarsylyq kórsete aldy.
Oıyndy esepti astanalyqtar ashty. Ekinshi kezeńniń 29-mınýtynda Mettıý Frettın qarsylastar qaqpasyn dál kózdedi. «Torpedo» ekinshi kezeńde tarazy basyn teńestirip, odan keıin alǵa da shyqty. Aldymen 33-mınýtta Denıs Barantsev, 38-mınýtta Fılıp Holm shaıba soǵyp ketti.
Úshinshi kezeńde qos komanda da alǵa qaraı umtyla tústi. «Torpedo» taǵy da shaıba soǵyp, kezdesý taǵdyryn túbegeıli sheship tastaýǵa tyryssa, «Barys» tarazy basyn teńestirýge umtyldy. Sońǵy mınýttarda «Torpedo» qaqpashysy Barrı Brast óreskel qatelik jiberdi. Ony bizdiń jigitter paıdalana alǵan joq. Al oıynnyń bitýine shamaly qalǵanda «Barys» qaqpashysyn altynshy oıynshyǵa almastyrdy. Bos qaqpaǵa «Torpedo» hokkeıshileri shaıba soǵyp ketti. Ol Denıs Barantsevtiń enshisine jazyldy. Esep 3:1. Búgingi kezdesýde «Torpedo» jeńiske jetti. Oıyndar serııasy 2:1 esebimen ázirge «Barystyń» paıdasynda tur.
Endi 4 naýryzda Nıjnıı Novgorod qalasynda taǵy bir kezdesý bolady. Odan keıin 6 naýryzda Astanada, odan keıin 8 naýryzda Nıjnıı Novgorodta oıyndar bolady. Alty kezdesýde jeńimpaz anyqtalmaǵan jaǵdaıda 10 naýryzda sońǵy sheshýshi oıyn elorda tórinde ótkiziledi.
