QHL pleı-off: 1/2 fınaldaǵy «Barystyń» qarsylasy anyqtaldy
NUR-SULTAN. QazAqparat - Qurlyqtyq hokkeı lıgasy pleı-off satysynyń jartylaı fınalynda elordalyq «Barys» komandasyna qarsylas bolatyn komanda anyqtaldy - qazaqstandyq hokkeıshiler Reseıdiń «Sıbır» klýbymen kezdesedi, dep habarlaıdy QazAqparat tilshisi.
Esterińizge sala ketelik, «Barys» pleı-off satysynyń shırek fınalynda Reseıdiń «Metallýrg» (Magnıtogorsk) komandasyn oıyndar serııasynda 4:1 esebimen súrindirdi. Al «Sıbır» «Avtomobılıst» (Ekaterınbýrg) klýbyn 4:1 esebimen jeńdi.
Eki komanda buǵan deıin pleı-off satysynda jolyqqan emes. Aıta keterligi, «Barys» Qurlyqtyq hokkeı lıgasyna bıyl 12-márte qatysty. Sonyń 10-ynda pleı-off satysynda baq synady. 2014, 2017, 2019 jyldarda jarystyń ekinshi kezeńine shyqty.
Al «Sıbır» óz tarıhynda pleı-off satysynda 6-márte baq synap otyr. Reseılik klýb 2013/2014, 2015/2016 jyldarda jartylaı fınalǵa deıin jetti.
Eki komanda búingi kúnge deıin qurlyqtyq hokkeı lıgasy turaqty kezeńinde 37 márte kezdesip, onyń 16-y «Barystyń» paıdasyna sheshildi. Bıylǵy dodada eki komanda bir-bir márteden jeńiske jetti.
«Barys» jáne «Sıbır» arasyndaǵy alǵashqy eki oıyn 17 jáne 19 naýryzda elordada ótkiziledi. Al eki komanda Novosibir qalasynda 21 jáne 23 naýryzda sheberlik baıqasady. Qajet bolǵan jaǵdaıda 25, 27, 29 naýryz kúnderi qosymsha kezdesýler bolady. Oıyndar bir komandanyń tórt jeńisine deıin sozylady.
