QHL: «Neftehımık» «Barystan» ese qaıtardy

Kezdesýde alǵashqy shaıbany «Barys» oıynshylary engizdi. Ony Darren Dıts óziniń enshisine jazdy. Bul kezde nebári 1-mınýt qana ótken bolatyn. Odan keıin 7-mınýtta «Neftehımık» sapynan Mıkael Rýohomaa mergendik tanytyp, tarazy basyn teńestirdi. Al 17-mınýtta «Barys» hokkeıshisi Roman Starchenko qaıtadan óz komandasyn alǵa shyǵardy. Esep 2:1.

Ekinshi kezeńde qonaqtar taǵy da esepti teńestirdi. Borıs Mıhnov 21-mınýtta qanjyǵasyn maılady. Budan keıin muzaıdyn ıeleri eki shaıba soǵyp, esepti ústemeleı tústi. Oıynnyń 32-mınýtynda «Barys» hokkeıshisi Kertıs Valk qaqpadan sańylaý tapsa, odan keıin 34-mınýtta Roman Starchenko esep aıyrmasyn eki shaıbaǵa jetkizdi. Esep 4:2. «Barys» alda.

Degenmen 41-mınýtta «Neftehımık» sapynan Pavel Kýlıkov shaıba soqty. Esep 4:3. Qonaqtar da jeńisti qoldan berýdi qalamaı, tarazy basyn teńestirýge barynsha kúsh saldy. Olar óz degenderine oıynnyń bitýine nebári 30 sekýnd qalǵanda qol jetkizdi. Muzaıdyn ıeleriniń óreskel qateligin «Neftehımık» hokkeıshisi sheber paıdalanyp ketti. Esep 4:4. Osynyń saldarynan oıyn overtaımǵa ulasty. Bul joly qonaqtar mergendik tanytyp, qorytyndy esepti belgiledi. Esep 4:5. Osylaısha «Barys» úshinshi oıyn qatarynan qarsylastaryna ese jiberip qoıdy. «Neftehımık» «Barystan» apta burynǵy jeńilisiniń esesin qaıtardy.

Endi «Barys» elordada 14 qyrkúıekte Nıjnıı Novgorod qalasynyń «Torpedo», 16 qyrkúıekte Qazannyń «Aq barysymen» kezdesse, 18 qyrkúıekte Ombynyń «Avangard» komandasyn qabyldaıdy.

Esterińizge sala ketelik, «Barys» qurlyqtyq hokkeı lıgasyndaǵy alǵashqy kezdesýin «Neftehımık» komandasymen ótkizip, olardy 6:1 esebimen jeńip qaıtqan edi.

Odan keıin «Barys» Reseıdiń Qazan qalasynda «Aq barystan» 3:4 esebimen jeńilip qaldy.

Al 9 qyrkúıekte Reseıdiń Nıjnıı Novgorod qalasynda «Torpedomen» kezdesip, olarmen negizgi kezeńde 6:6 esebimen teń oınady. Overtaımda muzaıdyn ıeleri bir shaıba soǵyp, jeńis «Torpedoǵa» buıyrdy.