QHL-dyń jańa maýsymy: «Barys» alǵashqy matchty rekordpen bastady
ASTANA. 9 qyrkúıek. QazAqparat - Keshe Qurlyqtyq hokkeı lıgasynyń altynshy chempıonaty aıasynda «Barys» hokkeı klýby alǵashqy oıynda Cherepovets qalasynyń «Severstal» komandasymen kezdesip, óz qarsylasyn 10:1 esebimen oısyrata utty.
Oıynnyń basynda esep ashylmasa da, «Barystyń» tafgaıy Djoshýa Gretton jáne qarsylas Pahrýdın Gımbatov arasyndaǵy tóbeles jankúıerlerdiń delebesin qozdyrdy. Bul jekpe-jekte Dj.Grettonnyń mereıi ústem boldy. Sodan «Barys» hokkeıshileriniń tynysy ashylǵan bolýy kerek, birneshe mınýttan keıin Dastın Boıdtyń tamasha shaıbasy qarsylastardyń qaqpasynan tabyldy. Al ekinshi kezeńniń alǵashqy mınýttarynda Brendon Bochenskı esepti 2:0-ge deıin jetkizdi. Osydan keıin Talǵat Jaılaýov erejeni buzyp, aıyp ýaqytyn óteýge attandy. Onyń artynan Maık Landın de oıynnan eki mınýtka shettetildi. Osylaısha, «Severstaldyń» bes oıynshysy «Barystyń» úsh hokkeıshisine qarsy oınap, esep aıyrmasyn 2:1-ge deıin qysqartty. Alaıda T.Jaılaýov muz aıdynyna oralǵan boıda óz qateligin túzete bildi. Onyń sheber bergen pasynan keıin Fedor Polışýk qarsylastardyń qaqpasyna úshinshi shaıbany salyp ketti. Bul shaıba sátti bolǵan shyǵar, artynan Mıhaıl Rahmanov, Naıdjel Doýs, Dmıtrıı Ýpper jáne Brendon Bochenskı qatarynan tórt shaıba salyp, esepti 7:1-ge jetkizdi. Oıynnyń úshinshi kezeńinde «Severstaldyń» bapkeri qaqpashy Ivan Kosýtınniń ornyna jas Artem Artemevty shyǵardy. Alaıda ol da qansha tyrysqanymen óz qaqpasyn qorǵaı almady. Roman Starchenko, Konstantın Rýdenko jáne Naıdjel Doýs ony qapy qaldyryp, taǵy úsh shaıbany salyp ketti. Qorytyndy esep - 10:1. Sóıtip, Qurlyqtyq hokkeı lıgasynyń kezekti altynshy maýsymy aıasynda «Barys» óziniń alǵashqy oıynyn rekordpen bastady. Maýsym bastalǵaly beri bundaı jetistikke áli birde-bir komanda jetken emes. Ótken chempıonatta da «Barystyń» hokkeıshileri segiz ret qatarynan jeńiske jetip, lıga tarıhynda bolmaǵan rekordqa jetken edi. Aıta keteıik, lıga aıasynda óner kórsetkeli beri «Barys» hokkeı klýby «Severstalmen» on ret kezdesken bolatyn. Sonyń úsheýinde jeńiske jetse, jeti oıynda utyldy. Bir ret «Severstaldyń» hokkeıshileri «Barysty» 7:1 esebimen jeńip ketken. Alaıda osy jolǵy oıynnan keıin «Barys» óz esesin eki ese qaıtardy deýge bolady.
