QHL-dyń jańa maýsymy: Astanada «Barystyń» alǵashqy oıyny ótedi
ASTANA. 7 qyrkúıek. QazAqparat - Erteń Qurlyqtyq hokkeı lıgasy aıasynda Astana qalasynyń «Barys» hokkeı klýby alǵashqy matchty ótkizedi. «Qazaqstan» sport kesheninde ótetin oıynda «Barystyń» hokkeıshileri «Severstal» komandasymen kezdesedi.
«Barys» úshin bul - alǵashqy oıyn. Al «Severstal» keshe «Avtomobılıstpen» kezdesip, óz qarsylasyn 2:1 (býllıt) esebimen jeńdi. Bıyl Qurlyqtyq hokkeı lıgasynyń komandalary quramynda biraz ózgerister boldy. Sodan bolar, buǵan deıingi chempıonatta oq boıy ozyq bolǵan komandalardyń álsizdigi baıqalady. Osylaısha, keshegi matchtarda «Vıtıaz» hokkeıshileri «Traktordan» esebimen 5:3 basym tússe, lıgaǵa jańadan qosylǵan horvatııalyq «Medveshchak» hokkeı klýby máskeýlik «Spartakty» 7:1 esebimen oısyrata utty. Al «Medveshchak» bıýdjeti eń az komandalardyń biri bolyp sanalady. Aıta keteıik, «Barystyń» erteńgi oıyny keshki saǵat 17:00-de bastalady. Ony «Qazsport» arnasynan tikeleı efır arqyly kórýge bolady.
