QHL: býllıt serııasynda «Barystyń» joly boldy
ASTANA. 8 qazan. QazAqparat - Búgin Astana qalasynyń «Barys» hokkeı klýby óz alańynda «Vıtıaz» komandasynan býllıt boıynsha basym tústi.
Oıynnyń birinshi kezeńinde esep ashylǵan joq. Al ekinshi kezeńde «Barys» qarsylastyń erejeni buzyp, bir hokkeıshige kem oınaǵanyn sheber paıdalanyp, esepti ashty. Kezeń sońynda tóreshiler «Vıtıaz» hokkeıshileriniń keıbir dóreki áreketterine qaramastan, astanalyq klýbtyń eki birdeı oıynshysyna aıyp ýaqytyn belgilep, eki mınýtqa muz aıdynynan alastatty. Osy kezde «Barystyń» hokkeıshileri 3/5 formatynda oınap, qorǵanysqa kóshti. Qaqpashy Arı Ahonen de qarsylastardyń adýyndy shabýyldaryn sheber qaıtara bildi. Alaıda besinshi oıynshynyń shyǵýyna sanaýly sekýndttar qalǵan kezde, Podolsk qalasynyń komandasy tarazy basyn teńestirip ketti. Esep - 1:1. Úshinshi kezeńniń altynshy mınýtynda qarsylastar bir shaıbamen alǵa shyqty. Sodan bastap «Barys» qarsylastardyń qaqpasyn uzaq ýaqyt boıy ala almady. «Vıtıazdyń» qaqpashysy - Ivan Lasýtın barlyq shaıbalardy toıtaryp otyrdy. Alaıda osy komandanyń úsh oıynshysy qatarynan erejeni buzǵannan keıin «Barys» óz múmkindigin qalt jibergen joq. Matchtyń aıaqtalýyna bes mınýttaı qalǵanda, Roman Savchenkonyń soqqysy dál tıdi. Esep - 2:2. Oıyn osymen aıaqtalyp, qosymsha ýaqyt belgilendi. Biraq onda da jeńimpaz anyqtalǵan joq. Sóıtip, býllıt soqqylary bastaldy. Onda Roman Starchenko býllıtti sheber iske asyryp, «Barysty» jeńiske jeteledi. Qorytyndy esep - 3:2. Astanalyq klýb taǵy eki upaıǵa qol jetkizdi. Aıta keteıik, osy oıynnan keıin «Barystyń» enshisinde 29 upaı bar. Qurlyqtyq hokkeı lıgasynyń Shyǵys konferentsııasynda ol kósh bastap tur. Al jalpy týrnırlik kestede 3-shi orynda keledi. Degenmen, «Barys» hokkeı klýby ózinen joǵary turǵan «SKA» (32 upaı) jáne «Dınamo-Máskeý» (31 upaı) komandalaryna qaraǵanda, 2-3 matchqa kem oınaǵan. Demek, taǵy talaı ret lıganyń kóshbasshysy atanýǵa tolyq múmkindik bar.
