QHL: «Barys» jeńisti oıyndar tizbegin jalǵastyrdy
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti oıynynda Reseıdiń Qazan qalasynyń «Aq barys» komandasyn qabyldady, dep habarlaıdy QazAqparat tilshisi.
7 qyrkúıekte qos komanda Qazan qalasynda ózara sheberlik baıqasqan edi. Bul joly 4:3 esebimen «Aq barys» jeńiske jetti. Dese de bul kezdesý tartysty ótken bolatyn. Nebári bir ǵana shaıbany artyq soqqan Tatarstan klýby bizdiń jigitterdi qur qol qaıtarǵan edi. Sol jeńilistiń qarymtasyn qaıtarýǵa «Barys» hokkeıshileri osy joly baryn salatyny belgili edi.
Soǵan qaramastan alǵashqy goldy «Aq barys» soǵyp ketti. Bul kezdesýdiń nebári 1-mınýty bolatyn. Onda qazandyq hokkeıshi Aleksandr Býrmıstrov mergendik tanytty. Al 10-mınýtta «Barystyń» kanadalyq legıoneri Kertıs Valk tarazy basyn teńestirdi. Budan keıin qos komanda tarapynan da birneshe shabýyl órbı tústi. Alaıda, olardyń uıymdastyrǵan shabýyldary óz nátıjesin alyp kelgen joq.
Ekinshi kezeń bastalasymen «Aq barys» hokkeıshileri esepte taǵy da alǵa shyqty. Ekinshi kezeń bastalǵannan keıin nebári 26 sekýnd ótkende qazandyq hokkeıshi Irjı Sekach óz komandasyn alǵa shyǵardy. Osydan soń shaıba arada 16 mınýt ótkende taǵy da bizdiń qaqpaǵa soǵyldy. Bul joly Djastın Azevedý mergendik tanytty. Osydan keıin «Barys» óz qaqpashysyn aýystyrdy. Buǵan deıin qaqpany kúzetken Sergeı Kýdrıavtsevtyń ornyna muzaıdynǵa Domınık Grahovına shyqty.
Ekinshi kezeń túgesiler tusta «Barys» jigitteri jankúıerlerge qýanysh syılap, esep aıyrmasyn qysqarta tústi. «Barystyń» kanadalyq oıynshysy Patrıs Korme 59-mınýtta qaqpany dál kózdedi. Esep 2:3. «Aq barys» áli de alda keledi.
Sońǵy kezeń bastalǵannan eki komanda shabýyl shebine kóbirek kóńil bóldi. Roman Starchenko «Aq barys» oıynshylary qateligin sheber paıdalana bildi. Sonyń nátıjesinde qaqpashymen betpe-bet shyǵýǵa múmkindik aldy jáne qaqpanyń ashyq qalǵan tusyn dál kózdedi. Esep 3:3. «Barys» jigitteri birshama ýaqyt san basymdyǵyne ıe boldy. Degenmen ony óz degenine paıdalana alǵan joq. Negizgi kezeń 3:3 esebimen teń aıaqtalyp, oıyn overtaımǵa ulasty. Overtaımda da jeńimpaz anyqtalǵan joq. Býllıtte «Barystyń» mereıi ústem boldy. Osylaısha olar jeńisti oıyndar tizbegin jalǵastyrdy.
Esterińizge sala ketelik, «Barys» qurlyqtyq hokkeı lıgasyndaǵy alǵashqy kezdesýin «Neftehımık» komandasymen ótkizip, olardy 6:1 esebimen jeńip qaıtqan edi.
Odan keıin «Barys» Reseıdiń Qazan qalasynda «Aq barystan» 3:4 esebimen jeńilip qaldy.
Al 9 qyrkúıekte Reseıdiń Nıjnıı Novgorod qalasynda «Torpedomen» kezdesip, olarmen negizgi kezeńde 6:6 esebimen teń oınady. Overtaımda muzaıdyn ıeleri bir shaıba soǵyp, jeńis «Torpedoǵa» buıyrdy.
Al 12 qyrkúıekte elordada «Neftehımık» 5:4 esebimen basym túsip, apta burynǵy jeńilisiniń esesin qaıtaryp ketti.
14 qyrkúıekte «Barys» óz muzaıdynynda Nıjnıı Novgorod qalasynyń «Torpedosymen» kezdesip, olardy 4:1 esebimen jeńip, qatarynan úsh jeńilis sátsizdigin toqtatty.
