QHL: «Barys» jartylaı fınaldan asa almady
ASTANA. QazAqparat - Elordalyq «Barys» Qurlyqtyq hokkeı lıgasy Shyǵys konferentsııasynda pleı-off kezeńiniń jartylaı fınalynan asa almady, dep habarlaıdy QazAqparat tilshisi.
Jarystyń bul satysynda olar Ombynyń «Avangard» komandasymen baq synasqan edi. Astanada ótken búgingi kezdesýde Shyǵys konferentsııasyndaǵy fınalǵa shyǵatyn komanda anyqtalýy múmkin bolatyn. Alǵashqy tórt kezdesýdiń nátıjesi boıynsha «Avangard» oıyndar serııasynda alda turdy.
Eki komanda arasyndaǵy alǵashqy eki kezdesý Astana qalasynda ótti. Alǵashqy oıynda «Avangard» bizdiń komandany 3:1 esebimen jeńip ketti. Odan keıin «Barys» jigitteri 4:2 esebimen tize búktirdi. Osylaısha, oıyndar serııasyndaǵy tarazy basy teńesti. Úshinshi kezdesýde ombylyq klýb 5:0 esebimen jeńiske jetip, oıyndar serııasynda taǵy da alǵa shyqty. Odan keıin ombylyqtar 3:1 esebimen kezekti ret jeńiske jetti. Nátıjesinde, «Avangard» oıyndar serııasynda 3:1 esebimen alǵa shyqqan edi.
Búgingi kezdesýde «Avangard» jeńiske jetse, olar jarysty jalǵastyrýǵa múmkindik alatyn edi. Al «Barys» basym tússe, oıyndar serııasy kem degende taǵy bir oıynǵa uzarady. Sondyqtan elordalyq klýb hokkeıshileri bul kezdesýge baryn salatyny belgili bolatyn.
Oıyn barysynda alǵashqy shaıbany aıdyn ıeleri soqty. Elordalyq hokkeıshi Mettıý Frettın 10-mınýtta óz komandasyn alǵa shyǵardy. Al kelesi shaıba ekinshi kezeń bastala salysymen soǵyldy. Bul joly taǵy da Mettıý Frettın mergendik tanytty. Degenmen, odan keıin bizdiń jigitter bir mınýttyń ishinde qaqpaǵa eki shaıba jiberip aldy. Oıynnyń 23-mınýtynda aldymen Nıkıta Pıvtsakın esep aıyrmasyn qysqartsa, odan keıin Kırıll Petrov tarazy basyn teńestirdi. Budan keıin «Avangard» eki márte oıynshylar sany basymdyǵyna ıe boldy. Aldymen 35-mınýtta ombylyq Teılor Bek shaıba soqsa, araǵa bir mınýt salyp komandalas áriptesi Sergeı Shırokov esepti ústemeleı tústi.
Úshinshi kezeńde Maksım Chýdınov taǵy bir shaıba soǵyp, esepti odan ári ulǵaıta tústi. Sońǵy mınýtta «Barys» sapynan Nıkıta Mıhaılıs esep aıyrmasyn qysqartty. Búgingi kezdesýde «Avangard» «Barystan» 5:3 esebimen basym tústi. Osylaısha, ombylyqtar oıyndar serııasynda 4:1 esebimen jeńip, jarystyń kelesi satysyna joldama aldy.
«Barys» jarystyń bul satysyna óz tarıhynda úshinshi márte shyqqan edi. Elordalyq klýb 2013/2014 jáne 2016/2017 jylǵy kezeńderde jankúıer qaýymyn osyndaı joǵary jetistigimen qýantqan bolatyn. Degenmen, ekeýinde de odan árige asa alǵan joq.
