QHL: «Barys» «Iokerıtti» tize búktirdi
ASTANA. QazAqparat - Elordalyq «Barys» bes kúndik úzilisten keıin qurlyqtyq hokkeı lıgasyndaǵy oıyndaryn qaıta jalǵastyrdy. Astanalyq komanda búgin Fınlıandııa astanasy - Helsınkı qalasynda jergilikti «Iokerıt» komandasymen kezdesti, dep habarlaıdy QazAqparat tilshisi.
Álemdik hokkeıde Fınlıandııa hokkeıshileri joǵary baǵalanady. Atalmysh eldiń quramasy talaı myqty qarsylasymen terezesi teń deńgeıde oıyn kórsetedi. Ony jankúıer qaýym jaqsy biledi. Sol fın eliniń namysyn qorǵap júrgen «Iokerıt» te qurlyqtyq hokkeı lıgasynda jaqsy nátıjege qol jetkizip keledi. Olar atalmysh básekege 2014/2015 jylǵy kezeńnen beri qatysyp júr. Sodan beri Gagarın kýbogynda eki márte jartylaı fınalǵa jetse, eki márte shırek fınalda baq synady. Bıylǵy jyly da jalpy týrnır kestesinde aldyńǵy oryndarda keledi.
«Iokerıt» sońǵy tórt oıynda jeńilistiń aşy dámin tatqan joq. Bir kezdesýinde syrtta, qalǵanyn óz aıdynynda ótkizdi. Al bizdiń «Barys» óz aıdynynda ótkizgen úsh kezdesýiniń barlyǵynda qarsylasyna ese jiberip qoıdy. Aldymen 14 qarashada Habarovskiniń «Amýrynan» negizgi kezeńde, Máskeýdiń «Dınamosynan» overtaımda, sondaı-aq Ýfanyń «Salavat ıÝlaevynan» 0:3 esebimen jeńilip qaldy . Degenmen olardyń bıyl jaqsy oıyn órnegin kórsetip júrgenin aıta ketýimiz qajet. Osynyń nátıjesinde týrnır kestesinde aldyńǵy ondyqta keledi.
Búgingi kezdesýde qos komanda da shabýyl shebine kóbirek kóńil bóldi. Dese de aıdyn ıeleri tarapynan dóreki qımyldar kóbirek kózge tústi. Osynyń saldarynan olardyń qatarynan Vıktor Lev pen Mıka Nıemı aıdynnan qýyldy. Degenmen «Barys» oıynshylar sany basymdyǵyn paıdalana alǵan joq. Birinshi kezeń teń nátıjemen aıaqtaldy.
Ekinshi kezeń astanalyq hokkeıshiler úshin sátti bastaldy. Aıdyn ıeleriniń óreskel qateligin sheber paıdalana bilgen «Barys» oıynshysy Álıhan Ásetov qaqpashymen betpe-bet shyqty. Eshbir asyp-saspastan shaıbany qaqpaǵa dál túsirdi. Osylaısha ol óziniń goldarynyń sanyn kóbeıte tústi. Budan keıin «Iokerıt» te bizdiń qaqpa mańynda jıi boı kórsetti.
Úshinshi kezeńniń aıdyn ıeleri sapynan Braıan O'Nıll 49-mınýtta tarazy basyn teńestirdi. Tipti, olardyń qarqyny sońǵy mınýtta erekshe kúsheıip ketti. Bizdiń komanda sapynan Konstantın Klımontov aıdynnan qýylyp, olar qarqynyn odan ári arttyrdy. Degenmen oıynnyń negizgi ýaqyty 1:1 esebimen aıaqtalyp, oıyn overtaımǵa ulasty.
Overtaımda da jeńimpaz anyqtala qoıǵan joq. Kezdesý taǵdyry býllıt arqyly sheshiletin boldy. Býllıtte «Barys» sapynan Darren Dıts oıynnyń núktesin qoıdy. Esep - 2:1. Osylaısha «Barys» úsh jeńilisten keıin qaıtadan jeńiske jetti.
Endi «Barys» eki oıynyn syrt aıdynda ótkizedi. Aldymen 25 qarashada ıAroslavldiń «Lokomotıv» (Reseı) jáne 27 qarashada Cherepovetstiń «Severstal» (Reseı) komandalarymen kezdesedi. Al 1 jeltoqsanda óz aıdynynda Ekaterınbýrgtiń «Avtomobılıst» klýbyn qabyldaıdy.
