QHL: «Barys» «Iokerıtten» iri eseppen basym tústi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti kezdesýinde Fınlıandııanyń «Iokerıt» komandasymen kezdesti, dep habarlaıdy QazAqparat tilshisi.
Eki komanda búgingi kúnge deıin segiz márte sheberlik baıqasqan. Qýanyshtysy, jeńiske jetý jóninen «Barystyń» qorjyny qomaqty. Astanalyq hokkeıshiler bes márte basym tússe, qarsylas klýbtyń úsh márte mereıi ústem boldy. Aıta keterligi, sońǵy úsh oıynda «Barys» «Iokerıtti» tize búktirgen edi. Bıylǵy qurlyqtyq hokkeı lıgasynda 2018 jyldyń 23 qarashasynda Fınlıandııanyń Helsınkı qalasynda bizdiń komanda olardy 2:1 esebimen jeńgen edi.
Fın hokkeıshileri búgingi kezdesýde sol ketken eseni qaıtarýǵa tyrysty. Esepti alǵash bolyp «Iokerıt» komndasy ashty. Kezdesýdiń 7-mınýtynda Sakarı Mannınen fın klýbyn alǵa shyǵardy. Degenmen birinshi kezeńde «Barys» tarazy basyn teńestirip ketti. Kezekti shabýyldyń birinde Álıhan Ásetov qarsylastar qaqpasynan sańylaý tapty.
Ekinshi kezeńde astanalyq klýb alǵa shyqty. Kezdesýdiń 22-mınýtynda Brendon Bochenskı qaqpany dál kózdedi. Esep 2:1. Fın hokkeıshileri de alǵa umtyldy. Olardyń qatarynan 35-mınýtynda Peter Regın esepti teńestirdi. Dese de ekinshi kezeń «Barystyń» basymdyǵymen máresine jetti. Astanalyq shabýylshy Andre Petersson qanjyǵasyn maılady. Esep 3:2.
Úshinshi kezeńde oıyn tizginin «Barys» óz qolynda ustady. Bar-joǵy 9 mınýt ishinde olar qatarynan tórt shaıba soǵyp ketti. Aldymen Roman Starchenko 41, Andre Petersson 43, Nıkıta Mıhaılıs 44, Egor Petýhov 46-mınýtta mergendik tanytty. Ao 50-mınýtta Mettıý Frettın qorytyndy esepti belgiledi. Esep 8:2. «Barys» búgingi qarsylasyn iri eseppen tize búktirdi. Osylaısha olar Chernyshev dıvızıonynda Ombynyń «Avangardyn» artqa salyp, kósh basyn shyqty. Jalpy týrnır kestesinde besinshi orynǵa kóterildi.
Budan buryn 31 qańtarda «Barys» Astanada Sankt-Peterbýrgtiń SKA kosandasynan 2:3 esebimen jeńilip qalǵan bolatyn.
«Barys» endi Astanada tórt oıyn ótkizedi. Aldymen 4 aqpanda Ýfanyń «Salavat ıÝlaev» klýbymen sheberlik baıqasady. Odan keıin bizdiń komandaǵa 12 aqpanǵa deıin azdaǵan úzilis bolady. «Barys» 12 aqpanda Novosibirdiń «Sıbır», 14 aqpanda Qytaıdyń «Kýnlýn Red Star», 16 aqpanda Ombynyń «Avangard» klýbtarymen sheberlik baıqasady.
