QHL: «Barys» «Vıtıazdi» tize búktirdi
ASTANA. QazAqparat - Búgin elordalyq «Barys» qurlyqtyq hokkeı lıgasynda kezekti oıynyn óz aıdynynda ótkizdi. Qazaqstandyq komanda Podolskiniń «Vıtıaz» komandasymen kezdesti, dep habarlaıdy QazAqparat tilshisi.
Aıta keterligi, sońǵy 10 oıynda «Barys» eki márte ǵana jeńistiń aşy dámin tatty. Sonyń nátıjesinde týrnır kestesinde 18 kezdesýden keıin 26 upaımen 11 orynda keledi. Al «Vıtıaz» ala-qula oıynymen orta tusta tur. Olardyń enshisinde 21 kezdesýden keıin 19 upaı bar, týrnır kestesinde 16 orynǵa ornyqty.
Bıyl eki komanda budan bir márte kezdesken edi. Podolsk qalasynda ótken oıynda bizdiń jigitter býllıtten 4:3 esebimen jeńip ketti. Sondyqtan «Vıtıaz» búgingi kezdesýge tastúıin daıyndyqpen kelgeni belgili. Degenmen aıdyn ıeleri olardyń bul oılaǵanyn júzege asyra qoıǵan joq.
Esepti alǵash bolyp «Barys» ashty. Alǵashqy gol 13-mınýtta soǵyldy. Ol Nıkıta Mıhaılıstiń enshisine jazyldy. Al 18-mınýtta tarazy basy teńesti. «Vıtıaz» sapynan Mıro Altonen mergendik tanytty. Ekinshi kezeń «Barys» úshin sátti boldy. Atap aıtqanda, 28-mınýtta Andre Peterson óz komandasyn alǵa shyǵarsa, 34-mınýtta Roman Starchenko qorytyndy esepti belgiledi.
Osylaısha «Barys» týrnır kestesindegi jaǵdaıyn odan ári jaqsarta tústi. Olar 19 oıynnan keıin 28 upaı jınap, toǵyzynshy orynǵa kóterildi.
Budan buryn «Barys» syrtta Chelıabiniń «Traktoryn» overtaımda 4:3 , óz aıdynynda Mınskiniń «Dınamo» komandasyn 3:1 esebimen jeńdi.
«Barys» endigi oıynyn elordada 28 qazanda Novosibirdiń «Sıbır» komandasyna qarsy ótkizedi.
