QHL: «Barys» úsh jeńilisten keıin «Torpedodan» basym tústi

«Barys» atalmysh komandamen 9 qyrkúıekte Nıjnıı Novgorod qalasynda sheberlik baıqasqan edi. Bul kezdesýde muzaıdyn ıeleri overtaımda 4:3 esebimen basym túsip, astanalyq hokkeıshiler jeńilip qalǵan bolatyn. Jalpy, bizdiń jigitter alǵashqy týrda 5 qyrkúıekte Nıjnekamskiniń «Neftehımıgin» 6:1 esebimen jeńgennen keıin eshqandaı komandadan basym túse almaı keledi. Atap aıtqanda, 7 qyrkúıekte Qazannyń «Aq barysynan» 3:4 esebimen jeńildi. Al 12 qyrkúıekte elordada «Neftehımık» 5:4 esebimen basym túsip, apta burynǵy jeńilisiniń esesin qaıtaryp ketti.

Búgingi kezdesýge «Barys» barynsha daıyndyq jasaǵany anyq. Komandaǵa bıyl bas bapker qyzmetine taǵaıyndalǵan belarýs mamany Andreı Skabelka bul joly basqa qaqpashy shyǵarýdy jón sanady. «Barystyń» shved qaqpashysy Henrıh Larssonnyń ornyna qazaqstandyq Sergeı Kýdrıavtsev alǵashqy mınýttan muzaıdynǵa shyqty. 

Alǵashqy kezeńde esepti «Torpedo» hokkeıshileri ashty. Bul oıynnyń 14-mınýty bolatyn. Ony Dmıtrıı Markovın óziniń enshisine jazdy. Osylaısha jaǵdaıdy birshama qıyndatyp alǵan «Barys» endi shabýyl shebine kóbirek kóńil bóldi. Osyndaı sátterdiń birinde kanadalyq Patrıs Korme tarazy basyn teńestirdi. Kezdesýdiń 21-mınýtynda soǵylǵan bul shaıbadan keıin eki komanda da gol soǵatyn birshama múmkindikterdi qur jiberip aldy. Al 45-mınýtta «Barys» shaıba soǵyp, alǵa shyqty. Soǵylǵan shaıba Mettıý Frettınniń enshisine jazyldy. 

Oıynnyń sońǵy mınýtynda «Barys» hokkeıshileri eki shaıba engizip úlgerdi. Atap aıtqanda, 59-mınýt 11 sekýndta Brendon Bochenskı esepti 3:1-ge jetkizse, araǵa nebári 28 sekýnd salyp Andre Peterson qorytyndy esepti belgiledi. Esep 4:1. Osylaısha «Barys» qatarynan úsh jeńilis sátsizdigin toqtatty. 

Endi «Barys» elordada 16 qyrkúıekte Qazannyń «Aq barysymen» kezdesse, 18 qyrkúıekte Ombynyń «Avangard» komandasyn qabyldaıdy.

Foto: hcbarys.kz