QHL: «Barys» «Traktordan» basym tústi
ASTANA. QazAqparat - Elordalyq «Barys» búgin qurlyqtyq hokkeı lıgasyndaǵy kezekti kezdesýin Chelıabiniń «Traktor» komandasyna qarsy ótkizdi, dep habarlaıdy QazAqparat tilshisi.
Eki komanda bıyl eki márte kezdesip úlgerdi. Aldymen 18 qazanda «Barys» Chelıabide «Traktordy» overtaımda 5:4 esebimen tize búktirgen edi.
Odan keıin 1 qarashada «Traktor» elordada ese qaıtaryp, bizdiń komandany overtaımda 4:3 esebimen jeńip ketti.
Búgingi oıyn qos komandanyń úshinshi márte kezdesýi.
«Traktor» jalpy týrnır kestesinde 33 upaımen 16-orynda keledi. Al «Barys» 46 upaımen 9-orynda tur. Aıta keterligi, «Traktor» sońǵy úsh kezdesýde jeńilistiń aşy dámin tatqan joq. Elordalyq klýb sońǵy kezde ala-qula oıynymen jankúıerlerdi qýanta almaı júrgeni belgili.
Búgingi kezdesýdiń birinshi kezeńinde eki shaıba soǵyldy. Esepti aldymen «Traktor» komandasyn ashty. Chelıabilik klýb sapynan Aleksandr Rybakov 7-mınýtta bizdiń qaqpadan sańylaý tapty. Osylaısha óz komandasyn alǵa shyǵardy. Al 14-mınýtta «Barys» hokkeıshisi Valerıı Orehov tarazy basyn teńestirdi.
Ekinshi kezeń tartysqa toly boldy. Eki komandada da esepti ulǵaıtatyn sátter kezdesken edi. Degenmen hokkeıshiler ol múmkindikterdi óz paıdasyna jarata alǵan joq.
Úshinshi kezeńde «Barys» shabýyl shebin kúsheıtti. Aldymen 2 márte «Traktor» sapynan Egor Dýgın men Dmıtrıı Alekseev aıdyn ústindegi dóreki qımyldaryna baılanysty eki mınýttyq aıyppen jazalandy. Bul múmkindikti bizdiń jigitter ózderiniń paıdasyna jarata alǵan joq. Al 51-mınýtta Aleksandr Rybakov aıdynnan qýyldy. Bul joly «Barys» sapynan Valerıı Orehov taǵy da mergendik tanytyp, óz komandasyn alǵa shyǵardy. Sońǵy mınýtta «Traktor» qaqpashyny oıynshyǵa almastyrdy. «Barys» sapynan Pavel Akolzın bos qaqpany dál kózdedi. Osylaısha «Barys» «Traktordy» 3:1 esebimen jeńdi.
Buǵan deıin «Barys» óz aıdynyndaǵy eki kezdesýde 1 jeltoqsan kúni Ekaterınbýrgtiń «Avtomobılıstine» 2:7 esebimen ese jiberse,
3 jeltoqsanda Magnıtogorskiniń «Metallýrgin» 3:2 esebimen jeńdi.
Endi «Barys» syrtta úsh oıyn ótkizedi. 8 jeltoqsanda Vladıvostoktyń «Admıral», 10 jeltoqsanda Habarovskide «Amýr», 12 jeltoqsanda Qytaıda «Kýnlýn Red Star» komandalarymen kezdesedi. Al 18 jeltoqsanda eloradada Cherepovetstiń «Severstal» komandasyn qabyldaıdy.
