KHL: «Barys» tórtinshi ret qatarynan jeńiske jetti
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýin Reseıdiń «Vıtıaz» (Podolsk) komandasyna qarsy ótkizdi, dep habarlaıdy QazAqparat tilshisi.
«Vıtıaz» ońaı qarsylas emes. Jalpy týrnır kestesinde «Baryspen» qatarlas keledi. Qos komanda da sondyqtan jaǵdaıyn jaqsartýǵa baryn saldy. Alǵashqy mınýtta reseılik klýbtyń basymdyǵy ańǵarylyp turdy. Olar «Barys» qaqpasyna alǵashqy bolyp gol soǵyp ketti. Ony 13-mınýtta ıAkýb Erjabek óziniń enshisine jazdy. Dese de 18-mınýtta elordalyq klýb sapynan Korban Naıt tarazy basyn teńestirdi.
Ekinshi kezeń «Barystyń» basymdyǵymen ótti. Qazaqstandyq klýb hokkeıshileri qatarynan úsh shaıba soǵyp, jeńiske jaqyndaı tústi. Aldymen 24-mınýtta Kertıs Valk «Barysty» alǵa shyǵarsa, 32-mınýtta Lınýs Vıddel esepti ústemeleı tústi. Al 39-mınýtta olardyń komandalas áriptesi Dmıtrıı Shevchenko mergendigimen kózge tústi.
Al úshinshi kezeńniń 48-mınýtynda «Vıtıaz» hokkeıshisi Svıatoslav Grebenşıkov esep aıyrmasyn qysqartqan edi. Elordalyq klýb sapynan 53-mınýtta Lınýs Vıddel óziniń búgingi kezdesýdegi ekinshi shaıbasyn soqty. Osylaısha elordalyq klýb qarsylasyn 5:2 esebimen jeńdi.
Aıta keterligi, sońǵy segiz kezdesýde «Barys» nebári bir oıynda jeńilip, qalǵanynyń barlyǵynda basym tústi. Sondaı-aq, elordalyq klýb qatarynan tórtinshi márte jeńiske jetip otyr.
Atalmysh oıynnan keıin «Barys» jalpy týrnır kestesinde besinshi orynǵa kóterildi. Al shyǵys konferentsııasynda úshinshi oryndy saqtasa, Chernyshev dıvızıonynda ekinshi orynǵa jaıǵasty.
«Barys» endi 24 jeltoqsanda Reseıdiń «Spartak» (Máskeý) komandasymen sheberlik baıqasady. Odan keıin elordada qatarynan tórt oıyn ótkizedi. Aldymen 25 jeltoqsanda Reseıdiń SKA (Sankt-Peterbýrg), 27 jeltoqsanda «Dınamo» (Máskeý), 29 jeltoqsanda «Avtomobılıst» (Ekaterınbýrg), 30 jeltoqsanda Qytaıdyń «Kýnlýn Red Star» komandalarymen muz aıdynǵa shyǵady.
