QHL: «Barys» «Torpedony» jeńe ala ma
ASTANA. QazAqparat - Elordalyq «Barys» qurlyqtyq hokkeı lıgasynyń pleı-off kezeńinde Nıjnıı Novgorod qalasynyń «Torpedo» komandasymen oıyndar serııasyn búgin Astanadaǵy kezdesýden bastaıdy, dep habarlaıdy QazAqparat tilshisi.
«Torpedo» komandasy 1946 jyly qurylǵan. Keńes odaǵy kezinde túrli lıgalarda baq synady. 2008 jylǵa deıin Reseı birinshiliginde oınady. Sol jyldan beri qurlyqtyq hokkeı lıgasynda synǵa túsip keledi. Sońǵy alty jylda turaqty túrde jarystyń pleı-off satysyna shyǵyp júr. 2015/2016 jylǵy kezeńde Batys konferentsııasynda jartylaı fınalǵa deıin jetti.
«Barys» pen «Torpedo» komandalary buǵan deıin qurlyqtyq hokkeı lıgasynda 24 márte kezdesti. Onyń ishinde 13-i «Barystyń» basymdyǵymen aıaqtaldy. Elordalyq klýb atalmysh qarsylasynyń qaqpasyna 71 shaıba soqsa, óz qaqpasyna 68 shaıba jiberip alǵan.
Qalǵanynda «Torpedo» basym boldy. Bıyl qos qurama eki márte kezdesti. 2018 jyldyń 9 qyrkúıeginde Nıjnıı Novgorodta «Torpedo» astanalyq klýbty overtaımda 6:5 esebimen jeńdi. «Barys» sol jyldyń 14 qyrkúıeginde Astanada atalmysh qarsylasynan 4:1 esebimen basym tústi.
Bıyl «Barys» jankúıer seniminen shyǵa alatyn deńgeıde oıyn kórsetti deýge tolyq negiz bar. Elordalyq klýb Chernyshev dıvızıonynda birinshi oryn aldy. Sondaı-aq, shyǵys konferentsııada ekinshi boldy.
Sondyqtan qazaqstandyq jankúıerler «Barystan» joǵary nátıje kútedi. Oǵan barlyq múmkindik bar. Oıynshylardyń barlyǵy derlik aldaǵy oıyndarǵa daıyn. Degenmen qorǵaýshy Kevın Dallman bul kezdesýlerde «Barysqa» kómektese almaıdy. Esesine Mett Frettın aıdynǵa qaıta oralady. Al Kertıs Volk áli jaraqatynan tolyq jazyla qoıǵan joq. Bul jaıynda «Barystyń» bas bapkeri Andreı Skabelka baıandap berdi. Ol qaqpada negizinen Henrık Karllson qorǵaıtynyn aıtty. Rasynda da, ol kóptegen oıyndarda qaqpany senimdi túrde kúzete bildi.
Býkmekerlik kompanııalar atalmysh jekpe-jekte «Barys» komandasy jarysty jalǵastyrýǵa múmkindik alady degen boljam jasaýǵa basymdyq berip otyr. Oıyndar serııasy eki komandanyń biriniń tórt jeńisine deıin jalǵasady.
Esterińizge sala ketelik, 26 jáne 28 aqpan kúnderi eki komanda Astanada oınasa, 2 jáne 4 naýryzda matchtar Nıjnıı Novgordta jalǵasady. Keıin 6 naýryzda Astanada, odan keıin 8 naýryzda Nıjnıı Novgorodta bolady. Alty kezdesýde jeńimpaz anyqtalmaǵan jaǵdaıda sońǵy sheshýshi oıyn elorda tórinde ótkiziledi.
Búgin, 26 aqpan kúngi kezdesý Astana ýaqytymen 19.30-da bastalady. Oıyn «Qazsport» telearnasynan tikeleı efırde kórsetiledi.
