QHL: «Barys» «Torpedodan» taǵy da jeńilip qaldy
ASTANA. QazAqparat - Elordalyq «Barys» qurlyqtyq hokkeı lıgasy pleı-off kezeńinde Nıjnıı Novgorodta jergilikti «Torpedo» komandasymen tórtinshi kezdesýin ótkizdi, dep habarlaıdy QazAqparat tilshisi.
Esterińizge sala ketelik, alǵashqy eki kezdesý Astana qalasynda ótti. Onyń ekeýinde de bizdiń komanda basym túsken bolatyn. Aldymen 26 aqpanda «Barys» «Torpedony» 4:1 esebimen jeńse , 28 aqpanda bizdiń jigitter atalmysh qarsylasyn 5:4 esebimen tize búktirdi . Al 2 aqpanda Nıjnıı Novgorodta «Torpedo» 3:1 esebimen «Barystan» ese qaıtardy. Nátıjesinde oıyndar serııasynda olar esep aıyrmasyn qysqartty.
Búgingi kezdesýde «Torpedo» alǵa umtyldy. Jeńiske jetse oıyndar serııasynda tarazy basy teńesedi. Osyndaı jaǵdaıdy túsingen olar bizdiń qaqpa mańynda jıi boı kórsetken edi. Soǵan qaramastan «Barys» jigitteri oıyn barysynda alǵash bolyp esep ashty. «Barys» hokkeıshisi Patrık Korme 7-mınýtta óz komandasyn alǵa shyǵardy. Al 14-mınýtta Pavel Akolzın esepti ulǵaıta tústi. Bizdiń hokkeıshiler 16-mınýtta qarsylastar qaqpasynan taǵy da sańylaý tapty. Bul gol Mettıý Frettınniń enshisine jazyldy.
Ekinshi kezeńde aıdyn ıeleri basym oınady. Keıbir sátterde «Barysta» esepti ulǵaıtatyn múmkindikter bolǵan edi. Ony tıimdi paıdalana alǵan joq. Tóreshiler de bizdiń oıynshylardy jıi-jıi aıdynnan qýdy. «Torpedo» bul kezeńde esep aıyrmasyn qysqarta aldy. Anton Volchenkov 30-mınýtta, Mıhaıl Varnakov 36-mınýtta bizdiń qaqpaǵa shaıba soǵyp ketti.
Eki komanda úshinshi kezeńde esepti ózgertýge tyrysty. «Torpedo» tarazy basyn teńestirýdi kózdese, «Barys» esepti ulǵaıtýǵa tyrysty. Nátıjesinde astanalyq klýb sapynan Kertıs Valk shaıba soqty. Degenmen oıyn sońyna taman «Torpedo» da bizdiń qaqpany dál kózdedi. Bul shaıbany 58-mınýtta Damır Jafıarov soqty. Al 59-mınýtta Denıs Parshın tarazy basyn teńestirdi. Esep 4:4. Oıyn overtaımǵa ulasty. Bul joly «Torpedo» komandasynyń joly boldy. Oıyn 5:4 esebimen «Torpedonyń» basymdyǵymen aıaqtaldy. Osylaısha oıyndar serııasy 2:2 esebimen teńesti.
Endi komandalar 6 naýryzda Astanada oınaıdy. Odan keıingi kezdesý 8 naýryzda Nıjnıı Novgorodta bolady. Alty kezdesýde jeńimpaz anyqtalmaǵan jaǵdaıda 10 naýryzda sońǵy sheshýshi oıyn elordada ótkiziledi.
