QHL: «Barys» syrt aıdynda «Sochıdi» utty
NUR-SULTAN. QazAqparat – QHL-dyń kezekti matchynda «Barys» Sochıde jergilikti klýbpen kezdesti, dep habarlaıdy QazAqparat tilshisi.
Bul oıynda elordalyqtardyń qaqpasyn Qazaqstan quramasynyń múshesi Henrık Karlsson qorǵady.
Birinshi kezeńde esep ashylǵan joq.
Ekinshi kezeńde 23-mınýtta san basymdylyǵyn paıdalanǵan «Barystyń» kapıtany Darren Dıts komandasyn alǵa shyǵardy. Eki mınýttan soń Roman Starchenko esepti 2:0-ge jetkizdi. Degenmen 28-mınýtta aıdyn ıelerinen Pavel Makarenko esepti qysqarta aldy.
Ekinshi kezeń sońyna taman óte dóreki oınaǵan «Sochıdiń» kapıtany Alekseı Petrov matchtyń aıaǵyna deıin aıdynnan qýyldy. Elordalyqtar bes mınýt boıy san basymdylyǵymen oınap, muny úshinshi kezeńde sátti paıdalana bildi. Áýeli «Barystyń» surmergeni R.Starchenko osy matchtaǵy ekinshi golyn soqsa, jaraqatynan aıyǵyp oralǵan kanadalyq qorǵaýshy Djessı Bleker 4:1-ge jetkizdi. Budan keıin Andreı Skabelkanyń shákirtterine osy esepti saqtap qalý qıynǵa túsken joq.
Osylaısha upaı sanyn 44-ke jetkizgen «Barys» QHL-dyń jalpy kestesinde altynshy, Shyǵys konferentsııasynda úshinshi orynǵa kóterildi. Elordalyqtar úshin asa mańyzdy kezdesý 9 jeltoqsan kúni bolmaq. Osy kúni olar syrt aıdynda «Avangardpen» kezdesedi. Ombylyqtar 48 upaımen Shyǵys konferentsııasynda elordalyqtardyń aldynda, ekinshi orynda keledi.
Eske sala keteıik, budan buryn «Barystyń» Sochıge attanǵanyn jazǵan bolatynbyz.
