QHL: «Barys» syrt aıdynda qytaılyq komandany jeńdi
ASTANA. QazAqparat - Búgin Astananyń «Barys» komandasy qurlyqtyq hokkeı lıgasyndaǵy kezekti oıyny aıasynda Qytaıdyń «Kýnlýn Red Star» komandasymen kezdesti, dep habarlaıdy QazAqparat tilshisi.
Atalmysh oıyn Qytaıdyń Shanhaı qalasyndaǵy «Feııan» stadıonynda ótti. «Kýnlýn Red Star» 2016 jyly quryldy. Sodan beri qurlyqtyq hokkeı lıgasynda synǵa túsip keledi. Ázirge joǵary tabystarǵa qol jetkize qoıǵan joq. Komanda quramynda negizinen sheteldik oıynshylar bar.
Eki komanda buǵan deıin tórt márte kezdesti. Onyń úsheýinde bizdiń jigitter jeńiske jetse, bireýinde qytaılyq hokkeıshiler basym tústi. Olar 2016 jyly 12 jeltoqsanda «Barysty» 5:1 esebimen tize búktirgen edi. Sońǵy eki oıynda elordalyq klýb myqty ekenin kórsetti.
Búgingi kezdesýde esepti «Barys» komandasy ashty. Oıynnyń 14-mınýtynda elordalyq Mettıý Frettın óz komandasyn alǵa shyǵardy. Ekinshi kezeńniń 25-mınýtynda «Kýnlýn Red Star» bir shaıba soqty. Ol Voıtek Volskıdiń enshisine jazyldy. Al ekinshi kezeńniń 29-mınýtynda «Barys» hokkeıshisi Anton Sagadeev esepti eseleı tústi. Keıin elordalyq taǵy bir hokkeıshi Nıkıta Mıhaılıs mergendik tanytyp, esepti 3:1-ge jetkizdi.
Úshinshi kezeńniń sońǵy mınýttarynda aıdyn ıeleri qaqpashyny hokkeıshige almastyrdy. «Barys» oıynshysy Vıktor Svedberg qaqpanyń bos qalǵanyn paıdalanyp, qorytyndy esepti belgiledi. Búgingi oıynda «Barys» 4:1 esebimen jeńiske jetti.
Eske salaıyq, buǵan deıin «Barys» syrt aıdynda Vladıvostoktyń «Admıralyn» 3:1 esebimen tize búktirgen bolatyn. Al 10 jeltoqsanda Habarovsktiń «Amýrynan» 1:2 esebimen jeńilip qaldy.
Endi «Barys» úsh oıynyn óz aıdynynda ótkizedi. Aldymen 18 jeltoqsanda Cherepovetstiń «Seversatl» klýbyn qabyldasa, odan keıin 20 jeltoqsanda ıAroslavldiń «Lokomotıv», 22 jeltoqsanda Vladıvostoktyń «Admıral» komandalarymen kezdesedi. 28 jeltoqsanda syrt aıdynda Chelıabiniń «Traktorymen» sheberlik baıqasady.
