QHL: «Barys» «Spartakqa» ese jiberdi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti kezdesýinde Máskeýdiń «Spartak» komandasyn qabyldady, dep habarlaıdy QazAqparat tilshisi.
Eki komanda bıylǵy dodada ekinshi márte kezdesip otyr. Qańtardyń 3-i kúni Máskeýde «Barys» atalmysh qarsylasyn 3:2 esebimen tize búktirdi.
«Spartak» ta pleı-off kezeńine shyǵýǵa kúsh salyp keledi. Búgingi kezdesý tartysty órbıtini belgili edi.
Oıyn «Barys» úshin sátti bastaldy deýge negiz bar. Alǵashqy 7 mınýtta bizdiń hokkeıshiler qarsylastar qaqpasyna úsh shaıba soǵyp úlgerdi.
Kezdesý bastalǵannan keıin nebári 29 sekýnd ótkende Vıktor Svedberg esep ashty. Al 5-mınýtta Mettıý Frettın esepti ústemeleı tústi. Oıynnyń 7-mınýtynda Andre Petersson úshinshi shaıbany soǵyp, jankúıerdi jelpindire tústi.
Degenmen odan keıin «Spartak» komandasy jınaqy qımyldaı bildi. Áýeli Ilıa Talalýev 11-mınýtta alǵashqy shaıbany soqsa, sosyn 12-mınýtta Anatolıı Nıkontsev mergendik tanytty. Máskeýlik komanda taǵy eki shaıbany ekinshi kezeńde soǵyp ketti. Aldymen 23-mınýtta Egor Krýjenkov «Barys» qaqpasynan sańylaý tapty. Esep 3:3.
Osylaısha «Spartak» úsh shaıba aıyrmasymen jeńilip jatyp, oıyn barysynda tarazy basyn teńestirdi. Al 24-mınýtta olar alǵa shyqty. «Spartak» sapynan Alekseı Grıshın bizdiń qaqpany dál kózdedi. «Barys» hokkeıshisi Anton Sagadeev sol 24-mınýtta tarazy basyn qaıta teńestirdi. Oıynnyń 35-mınýtynda «Barys» qaqpashysy Domınık Grahovına óreskel qatelik jiberip, «Spartak» sapynan Anatolıı Nıkontsev bos qaqpaǵa shaıba soqty. Esep 4:5.
Úshinshi kezeńde «Barys» basym oınaǵanymen, tarazy basyn teńestire almady. Nátıjesinde «Spartak» 5:4 esebimen jeńiske jetti.
Eske salaıyq, «Barys» budan buryn óz aıdynynda úsh kezdesý ótkizdi. Aldymen 8 qańtarda Habarovskiniń «Amýr» komandasynan 4:2 esebimen basym tústi, odan keıin Qytaıdyń «Kýnlýn Red Star» klýbynan 1:3 esebimen jeńilip qaldy. Al «Barys» 15 qańtarda Sochıdiń «Sochı» komandasyn býllıtpen 3:2 esebimen jeńdi.
«Barys» endi Astanada bir oıyn ótkizedi. Elordalyq klýb 17 qańtarda Ýfanyń «Salavat ıÝlaev» komandasyn qabyldaıdy.
Qurlyqtyq hokkeı lıgasy negizgi kezeńi aıaqtalýyna bir aıdan astam ýaqyt qaldy. Bul aralyqta «Barys» 14 oıyn ótkizedi. Onyń 8-i syrt aıdynda bolsa, 6-ýy Astanada oınalady. Odan keıin pleı-off kezeńine shyqqan komandalar Gagarın kýbogyn sarapqa salady.
Foto: www.hcbarys.kz
