QHL: «Barys» «Spartak» komandasynan jeńilip qaldy
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýin Reseıdiń «Spartak» (Máskeý) komandasyna qarsy ótkizdi, dep habarlaıdy QazAqparat tilshisi.
Aıta keterligi, «Barys» budan burynǵy tórt kezdesýin jeńispen aıaqtady. Nátıjesinde týrnır kestesindegi jaǵdaıyn jaqsartyp aldy. «Spartak» ta osal qarsylas emes. Reseılik klýb týrnır kestesindegi «Baryspen» qatarlas tur.
Búgingi kezdesý óte tartysty ótti deýge ábden bolady. Qos komanda tarapynan tolassyz shabýyl jasaldy. Oıynnyń alǵashqy kezeńinde «Spartak» komandasynyń azdaǵan basymdyǵy baıqalyp turdy. Alǵashqy shaıbany reseılik klýb sapynan Ilıa Zýbov 8-mınýtta soǵyp ketti.
Ekinshi kezeńde eki komanda da alǵa qaraı umtylǵan edi. «Barys» hokkeıshileri gol soǵatyn birneshe múmkindikti qur jeberip aldy. Esesine 24-mınýtta «Spartak» sapynan 24-mınýtta Artem Fedorov esepti ústemeleı tústi. Al 26-mınýtta «Barys» hokkeıshisi Arkadıı Shestakov mergendik tanytyp, esep aıyrmasyn qysqarta tústi. Al oıynnyń bitýine sanaýly sekýnd qalǵanda «Spartak» sapynan Aleksandr Hohlachev qorytyndy esepti belgiledi. Osylaısha «Barys» qarsylasyna 1:3 esebimen jol berdi.
Úshinshi kezeń de tolassyz shabýylǵa ulasty. «Barys» birneshe márte san basymdyǵyne ıe boldy. Dese de ony óz paıdasyna jarata alǵan joq.
Aıta keterligi, «Barys» budan buryn Reseıdiń «Vıtıaz» (Podolsk) komandasynan basym túsken edi .
«Barys» endi elordada qatarynan tórt oıyn ótkizedi. Aldymen 25 jeltoqsanda Reseıdiń SKA (Sankt-Peterbýrg), 27 jeltoqsanda «Dınamo» (Máskeý), 29 jeltoqsanda «Avtomobılıst» (Ekaterınbýrg), 30 jeltoqsanda Qytaıdyń «Kýnlýn Red Star» komandasymen muz aıdynǵa shyǵady.
