QHL: «Barys» «Sochıdi» tize búktirdi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti oıynynda Reseıdiń Sochı qalasynda jergilikti «Sochı» komandasymen kezdesip, 3:0 esebimen basym tústi, dep habarlaıdy QazAqparat tilshisi.
«Sochı» komandasynyń qurylǵanyna bıyl bes jyl tolady. Soǵan qaramastan olar qurlyqtyq hokkeı lıgasynda táp-táýir nátıjege qol jetkizip keledi. Alǵashqy tórt jylda úsh márte atalmysh lıganyń batys konferentsııasynda shırek fınalǵa deıin jetti. Bıyl jalpy týrnır kestesinde 47 upaımen 14 orynda tur.
Eki komanda tórt jyl ishinde segiz márte sheberlik baıqasqan. Onyń 4-eýi «Sochıdiń» basymdyǵymen aıaqtalsa, qalǵanynda «Barys» jeńiske jetti. Aıta keterligi, sońǵy úsh kezdesýde «Sochı» basym túsken. Qos komanda bıylǵy qurlyqtyq hokkeı lıgasynda alǵash ret kezdesip otyr.
«Barys» syrt aıdyndaǵy buǵan deıingi úsh kezdesýdiń ekeýinde jeńiske jetti. Elordalyq klýb 28 jeltoqsanda Chelıabide «Traktordy» 0:3 esebimen oısyrata jeńse, odan keıin 30 jeltoqsanda Ombyda «Avangardqa» býllıtten 3:4 esebimen utylyp qaldy. Bizdiń hokkeıshiler Máskeý qalasynda jergilikti «Spartaktan» 3 qańtarda 3:2 esebimen basym tústi.
Búgingi kezdesýde «Barys» ózderin jaqsy qyrynan kórsetti. Qarsylastar shabýylyna toıtarys berip, ózderi de qarsylastar qaqpasy mańynda qaýipti sátter uıymdastyrdy. Osyndaı sátterdiń birinde Darren Dıts óz komandasyn alǵa shyǵardy. Alǵashqy kezeń 1:0 esebimen bizdiń basymdyǵymyzben aıaqtaldy.
Ekinshi kezeńde de bizdiń hokkeıshiler qanjyǵasyn maılady. «Barys» sapynan 26-mınýtta Mettıý Frettın mergendik tanytty. Qos komanda da esepti ózgertetin múmkindikter boldy. Degenmen olardyń eshbiri dittegen maqsatyna jete alǵan joq.
Taǵy bir shaıba úshinshi kezeńde soǵyldy. Ony da bizdiń hokkeıshiler ózderiniń enshisine jazdy. Atap aıtqanda, 46-mınýtta Kertıs Valk qaqpany dál kózdedi. «Barys» búgingi kezdesýde 3:0 esebimen jeńiske jetti.
Osynyń nátıjesinde «Barys» jalpy týrnır kestesinde altynshy orynǵa kóterildi. Al shyǵys konferentsııasynda besinshi orynnan úshinshi orynǵa kóterilse, Chernyshev dıvızıonynda Ombynyń «Avangardyn» artqa salyp, kósh tizginin qolǵa aldy.
«Barys» komandasy endi Astanada qatarynan bes oıyn ótkizedi. Aldymen 8 qańtarda Habarovskiniń «Amýrymen» kezdesse, odan keıin 10 qańtarda Qytaıdyń «Kýnlýn Red Star», 14 qańtarda búgingi qarsylasymyz - «Sochı», 15 qańtarda Máskeýdiń «Spartak», 17 qańtarda Ýfanyń «Salavat ıÝlaev» komandalaryn qabyldaıdy.
