QHL: «Barys» SKA komandasynan jeti oıyn qatarynan jeńildi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti kezdesýinde Sankt-Peterbýrgtiń SKA komandasyn qabyldady, dep habarlaıdy QazAqparat tilshisi.
SKA komandasy qurlyqtyq hokkeı lıgasyndaǵy úzdikter qatarynda sanalady. Jylma-jyl joǵary deńgeıde oıyn órnegin kórsetip keledi. Eki márte Gagarın kýbogyn enshiledi. Bıyl da týrnır kestesinde kósh basynda tur.
Qurlyqtyq hokkeı lıgasynda eki komanda 20 márte kezdesken edi. Onyń ishinde tórteýi bizdiń komandanyń jeńisimen aıaqtaldy. Qalǵan oıyndarda SKA basymdyq tanytty.
Aıta keterligi, «Barys» 2015 jylǵy 2 qazannan beri atalmysh qarsylasyn jeńe almaı keledi. Sońǵy 6 kezdesýdiń barlyǵynda SKA basymdyq tanytty. Bıylǵy 24 qańtarda Sankt-Peterbýrgte ótken oıynda da aıdyn ıeleri býllıtten 3:2 esebimen jeńiske jetti https://kaz.inform.kz/news/khl-barys-koshbasshy-komandadan-zhenilip-kaldy_a3491535.
«Barys» sol ketken eseni qaıtarýǵa tyrysty. Bizdiń komanda alǵashqy mınýttan oıyn tizginin qolǵa alýǵa umtyldy. Qarsylastar qaqpasy mańynda jıi shabýyl da uıymdastyrdy. Elordalyq klýb 1-mınýtta esep ashty. Ony «Barys» sapynan Andre Peterson soqty. Degenmen birinshi kezeń qarsylastar basymdyǵymen aıaqtaldy. Oıynnyń 11-mınýtynda SKA sapynan Naıl ıAkýpov mergendik tanytsa, 16-mınýtta Pavel Datsıýk esepti ústemeleı tústi. Esep 1:2. Qarsylastar alǵa shyqty.
Ekinshi kezeńde «Barys» taǵy da óz qaqpasyna shaıba jiberip aldy. Oıynnyń 23-mınýtynda qarsylas komanda qatarynan Naıl ıAkýpov shaıba soǵyp ketti. Budan keıin aıdyn ıeleri es jıǵandaı boldy. SKA hokkeıshileri jıi-jıi dóreki áreketterge boı aldyrdy. Olardyń qatarynan aıdynnan qýylǵandar kóbeıip ketti. Oıynshylar basymdyǵyn sátti paıdalanǵan «Barys» 31-mınýtta esep aıyrmasyn qysqartty. Esep 2:3. Soǵylǵan shaıba aıdyn ıeleriniń qarqynyn údete tústi.
Úshinshi kezeńde «Barys» shabýylǵa shyqty. Degenmen astanalyq klýb oıynshylary dittegen maqsatyna jete almaı jatty. Sońǵy 2 mınýtta aıdyn ıeleri qaqpashyny altynshy oıynshyǵa almastyrdy. Degenmen esep ózgergen joq. SKA «Barystan» 3:2 esebimen basym tústi.
Esterińizge sala ketelik, 29 qańtarda «Barys» Novosibirde jergilikti «Sıbır» komandasynan overtaımda 2:3 esebimen jeńilip qalǵan edi.
Endi «Barys» Astanada bes oıyn ótkizedi. Aldymen 2 aqpanda Fınlıandııanyń «Iokerıt» komandasyn qabyldasa, 4 aqpanda Ýfanyń «Salavat ıÝlaev» klýbymen sheberlik baıqasady. Odan keıin «Barys» 12 aqpanǵa deıin eshqandaı resmı kezdesý ótkizbeıdi.
Foto: www.hcbarys.kz
