QHL: «Barys» SKA komandasyn bes jyldan keıin jeńdi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti oıynynda Reseıdiń SKA (Sankt-Peterbýrg) komandasyn qabyldady, dep habarlaıdy QazAqparat tilshisi.
Búgingi kezdeýde aıdyn ıeleri alǵashqy bolyp esep ashty. Oıynnyń 14-mınýtta elordalyq Anton Sagadeev mergendik tanytty. Odan keıin 19-mınýtta Darren Dıts esepti ústemeleı tústi.
Ekinshi kezeńde reseılik hokkeıshiler sapynan Ivan Morozov «Barys» qaqpasynan sańylaý tapty. Al úshinshi keezńniń 44-mınýtynda SKA hokkeıshisi Evgenıı Tımkın tarazy basyn teńestirdi.
Negizgi kezeń 2:2 esebimen teń aıaqtaldy. Jeńimpaz overtaımda da anyqtalǵan joq. Býllıtte «Barystyń» joly boldy. Osylaısha elordalyq klýb atalǵan qarsylasynan bes jyldan keıin alǵash ret basym túsip otyr. Sońǵy ret qazaqstandyq klýb SKA komandasyn 2015 jyldyń 28 qazanynda jeńgen edi.
Eki komanda buǵan deıin 24 márte kezdesti. Onyń 4-i «Barystyń» jeńisimen aıaqtalsa, qalǵanynda reseılik klýb basym tústi. Sońǵy toǵyz oıynda SKA klýby basymdyq tanytyp kele jatqan bolatyn.
Esterińizge sala ketelik, budan buryn «Barys» komandasy qyzmetkerleri men oıynshylarynan koronavırýs ınfektsııasy tabyldy. Soǵan baılanysty komanda eki aptaǵa karantınge jiberildi. Oıyndar keıinge shegerildi.
Endi elordalyq klýb 7 qazanda Reseıde Ekaterınbýrgtiń «Avtomobılıst» komandasymen kezdesedi. Odan keıin 10 qazanda elordada Reseıdiń «Severstal» klýbyn qabyldaıdy.
