QHL: «Barys»-«Sıbır» oıynyn qaıdan kórýge bolady
NUR-SULTAN. QazAqparat - Elordalyq «Barys» qurlyqtyq hokkeı lıgasynda búgin Reseıde Novosibir qalasynyń «Sıbır» komandasymen kezdesedi, dep habarlaıdy QazAqparat tilshisi.
Oıyn elorda ýaqytymen saǵat 19.30-da bastalyp, «Qazsport» telearnasynan tikeleı efırde kórsetiledi.
Eki komanda buǵan deıin 37 márte kezdesti. Onyń 14-i «Barystyń» jeńisimen aıaqtalsa, qalǵanynda «Sıbır» jeńiske jetti.
Sońǵy oıynda «Barys» elordada Reseıdiń «Ak Bars» (Qazan) komandasynan 1:3 esebimen jeńilip qaldy. Atalǵan kezdesýde elordalyq klýb sapynan Nıkıta Mıhaılıs 21-mınýtta esep ashqanymen odan keıin reseılik klýb úsh shaıba soǵyp ketti.
Al «Sıbır» Novosibirde 21 qazanda Chelıabiniń «Traktorynan» 3:1 esebimen basym tústi.
«Barys» 14 oıynnan 16 upaı jınap, jalpy týrnır kestesinde 18-orynda keledi. Al «Sıbır» 20 oıynnan keıin 15 upaımen 19-orynda tur.
