QHL: «Barys» «Sıbırden» jeńilip qaldy
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti kezdesýinde Novosibirdiń «Sıbır» komandasynan jeńilip qaldy, dep habarlaıdy QazAqparat tilshisi.
«Barys» jarystyń pleı-off kezeńine birneshe týr buryn qol jetkizip qoıǵan edi. Soǵan qaramastan árbir oıynda jankúıer seniminen shyǵýǵa kúsh salyp keledi. Al «Sıbır» bolsa ázirge mundaı múmkindikke qol jetkize almaı otyr. Jalpy týrnır kestesinde 18 orynda tur. Týrnır kestesindegi alǵashqy 16 oryndaǵy komandalar pleı-off kezeńine shyǵyp, Gagarın kýbogyn sarapqa salady.
Búgingi kezdesýdi joǵary qarqynda ótti dep aıtýǵa bolady. Eki komanda shabýylǵa kóbirek kóńil bóldi. Degenmen esepti alǵash bolyp aıdyn ıeleri ashty. Oıynnyń 32-mınýtynda Djordan Kardon bizdiń qaqpadan sańylaý taýyp ketti. Budan keıin qos komanda tarapynan shaıba soǵatyn birneshe múmkindik boldy. Dese de olardyń barlyǵy qaqpaǵa darı qoıǵan joq. Al 54-mınýtta «Barys» tarazy basyn teńestirdi. Bul joly Maksım Semenov mergendik tanytty. Osynyń nátıjesinde oıyn overtaımǵa ulasqan edi.
Overtaımda aıdyn ıeleriniń joly boldy. Novosibir komandasy sapynan 61-mınýtta Jılber Brıýle jeńis shaıbasyn soqty. Osylaısha «Barys» qarsylasyna ese jiberip qoıdy.
Elordalyq klýb endi 31 qańtarda Astanada Sankt-Peterbýrgtiń SKA komandasyn qabyldaıdy. «Barys» olardan 24 qańtarda overtaımda 2:3 esebimen jeńilip qalǵan bolatyn.
