QHL: «Barys» «Severstal» komandasyn tize búktirdi
ASTANA. QazAqparat - Astanalyq «Barys» qurlyqtyq hokkeı lıgasyndaǵy kezekti oıynynda elordada Cherepovetstiń «Severstal» komandasyn qabyldady, dep habarlaıdy QazAqparat tilshisi.
«Barys» bıyl buǵan deıin «Severstal» komandasymen Cherepovetste kezdesti. Ol oıynda bizdiń komanda 5:3 esebimen basym tústi.
Jalpy, eki komanda búgingi kúnge deıin 20 márte kezdesken. Onyń ishinde 10-y «Barystyń» basymdyǵymen aıaqtalsa, qalǵanynda «Severstal» jeńiske jetti. Bul jóninen eki komanda bir-birimen qatarlas tur.
Búgingi kezdesýde «Barystyń» basymdyǵy ańǵarylyp turdy. Degenmen birinshi kezeńde aıdyn ıeleri qarsylastar qaqpasynan sańylaý taba alǵan joq. Alǵashqy gol ekinshi kezeńniń 30-mınýtynda soǵyldy. Ony Kevın Dallmenniń pasynan keıin Nıkıta Mıhaılıs sheber oryndaı bildi. Budan keıin eki komanda da gol soǵatyn múmkindikter boldy. Degenmen ol dittegen jerine jetpeı jatty.
Búgingi kezdesýde eki komanda da dóreki qımyl kórsete qoıǵan joq. Aıdynnan qýylǵan oıynshylar sany az boldy.
Oıynnyń sońǵy mınýttary «Barys» úshin sátti boldy. Máselen, 57-mınýtta Patrıs Korme mergendik tanytty. Al sońǵy mınýtta «Severstal» qaqpashyny oıynshyǵa almastyrdy. Osynyń saldarynan qaqpa bos qaldy. Ony Nıkıta Mıhaılıs sheber paıdalanyp, bos turǵan qaqpaǵa shaıbany emin-erkin soǵyp ketti. Osylaısha «Barys» qarsylasynan 3:0 esebimen basym tústi.
Eske salaıyq, buǵan deıin «Barys» syrt aıdynda Vladıvostoktyń «Admıralyn» 3:1 esebimen tize búktirgen bolatyn.
Al 10 jeltoqsanda Habarovsktiń «Amýrynan» 1:2 esebimen jeńilip qaldy.
Odan keıin 12 jeltoqsanda Qytaıdyń «Kýnlýn Red Star» komandasyn 4:1 esebimen jeńdi.
Endi «Barys» eki oıynyn óz aıdynynda ótkizedi. Aldymen 20 jeltoqsanda ıAroslavldiń «Lokomotıv», 22 jeltoqsanda Vladıvostoktyń «Admıral» komandalarymen kezdesedi. 28 jeltoqsanda syrt aıdynda Chelıabiniń «Traktorymen» sheberlik baıqasady.
