QHL: «Barys» «Severstalden» basym tústi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti oıynyn Cherepovetstiń «Severstal» komandasymen ótkizip, 5:3 esebimen basym tústi, dep habarlaıdy QazAqparat tilshisi.
«Severstal» qurlyqtyq hokkeı lıgasyndaǵy ortanqol komandanyń biri sanalady. Týrnır kestesinde bıyl kósh sońynda kele jatqany sony ańǵartady. «Barystyń» búgingi kezdesýde olardan jaqsy oınaǵany kózge kórinip turdy.
Alǵashqy shaıba 6-mınýtta soǵyldy. «Barys» kezekti shabýylynda ony golmen túıindedi. Komandalas áriptesteri Darren Dıts pen Nıkıta Mıhaılıstiń shyǵaryp bergen pasyn Mettıý Frettın golǵa aınaldyryp ketti. Budan keıin de bizdiń komandanyń esepti ulǵaıtatyn múmkindigi bolǵan edi. Onyń birinde astanalyq hokkeıshiler múlt ketse, endigi birinde qarsylastary ábjildik tanytty. Dese de, aıdyn ıeleri de qarsy shabýyl uıymdastyrdy. Sondaı sátterdiń birinde Igor Geraskın men Danııl Vovchenko uıymdastyrǵan shabýyldy ıÝrıı Trýbachev túıindedi. Esep 1:1. Birinshi kezeńde qos komanda teń nátıjege qanaǵat bildirip tarasty.
Ekinshi kezeń bastalǵannan keıin de «Barys» qarsylastar qaqpasy mańynda jıi boı kórsetti. Tolassyz shabýylǵa shyqty. Kóp sátte «Severstal» qaqpashysy Domınık Fýrh ózine baǵyttalǵan shaıbalarǵa tosqaýyl bola bildi. Osyndaı sáttiń birinde «Barys» hokkeıshisi Anton Sagadeev onymen betpe-bet shyqty. Mundaı múmkindikti astanalyq hokkeıshi óz yńǵaıyna paıdalandy. Osylaısha búgingi kezdesýde «Barys» komandasy ekinshi márte alǵa shyqty. Odan keıin 33-mınýtta Nıkıta Mıhaılıs esepti ulǵaıta tústi. Al 35-mınýtta Darren Dıtstiń de qanjyǵasy maılandy. Esep 4:1. Ekinshi kezeń «Barystyń» basymdyǵymen aıaqtaldy.
Úshinshi kezeńde aıdyn ıeleri basymdyǵyn kórsete bastady. Aldymen Mateı Stranskı 42-mınýtta bir shaıba engizse, 45-mınýtta Rýslan Karlın esep aıyrmasyn qysqartty. Sońǵy bir mınýtta «Severstal» qaqpashyny oıynshyǵa almastyrdy. Qaqpanyń bos qalǵanyn kórgen Mettıý Frettın shaıbany oǵan dál kózdedi. Bul shaıba oıyn taǵdyryn sheshti. «Barys» «Severstalden» 5:3 esebimen basym tústi.
«Barys» óz aıdynynda ótkizgen úsh kezdesýiniń barlyǵynda qarsylasyna ese jiberip qoıdy. Aldymen 14 qarashada Habarovskiniń «Amýrynan» negizgi kezeńde, Máskeýdiń «Dınamosynan» overtaımda 2:3, sondaı-aq Ýfanyń «Salavat ıÝlaevynan» 0:3 esebimen jeńilip qaldy.
Budan keıin syrt aıdynda Helsınkıdiń «Iokerıtin» býllıtte 2:1 esebimen tize búktirdi. Osynyń nátıjesinde «Barys» úsh oıyndyń jeńilis serııasyn toqtatty. Degenmen kelesi kezdesýinde ıAroslavldiń «Lokomotıvinen» 3:5 esebimen jeńilip qaldy.
Endi «Barys» elordada qatarynan úsh komandany qabyldaıdy. Aldymen 1 jeltoqsanda Ekaterınbýrgtiń «Avtomobılıst» aıdynǵa shyqsa, odan keıin 3 jeltoqsanda Magnıtogorskiniń «Metallýrg», 6 jeltoqsanda Chelıabiniń «Traktor» komandalarymen sheberlik baıqasady.
