QHL: «Barys» «Salavat ıÝlaev» komandasynan jeńilip qaldy
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti kezdesýinde Reseıdiń Ýfa qalasynda jergilikti «Salavat ıÝlaev» (Ýfa) komandasymen oınady, dep habarlaıdy QazAqparat tilshisi.
Elordalyq klýb 53 oıynnan keıin 67 upaı jınap, týrnır kestesinde altynshy orynǵa jaıǵasty. Al «Salavat ıÝlaev» 50 oıynnan keıin 55 upaımen 15 orynda tur. Jarystyń kelesi satysyna shyǵý múmkindigine qos komanda da qol jetkize alǵan joq. Aıta keterligi, eki komandanyń sońǵy tórt kezdesýinde «Barys» hokkeıshileri basym túsip keledi.
Aıdyn ıeleri sol olqylyqtyń ornyn toltyrý maqsatynda bar kúshin saldy. Alǵashqy mınýttan oıyn tizginin qolǵa alýǵa tyrysty. Nátıjesinde birinshi kezeńde reseılik hokkeıshiler «Barys» qaqpasyna eki shaıba soǵyp ketti. Aldymen 12-mınýtta Dmıtrıı Kýgryshev qanjyǵasyn maılasa, 18-mınýtta Tezmý Hartıkaınen esepti ulǵaıta tústi.
«Barys» hokkeıshileri ekinshi kezeńde tarazy basyn teńestirýge umtyldy. Olardyń qatarynan 32-mınýtta Atte Ohtamaa mergendik kórsetti.
Úshinshi kezeńde «Salavat ıÝlaev» sapynan 41-mınýtta Aleksandr Kadeıkın gol soǵyp ketti. Oǵan 43-mınýtta elordalyq hokkeıshi Roman Starchenko bir shaıbamen jaýap berdi. Al 49-mınýtta reseılik komandadan Tezmý Hartıkaınen taǵy goldyń avtory atandy. «Salavat ıÝlaev» sapynan 56-mınýtta Nıkıta Soshnıkov qorytyndy esepti belgiledi. «Barys» qarsylasynan 2:5 esebimen jeńilip qaldy.
Budan buryn «Barys» Sankt-Peterbýrg qalasynda jergilikti SKA komandasynan 4:7 esebimen súringen edi.
«Barys» endi bir oıyndy syrt aıdynda ótkizedi. Olar 27 qańtarda «Avtomobılıst» (Ekaterınbýrg) klýbymen sheberlik baıqasady. Odan keıin elordada 30 qańtarda Reseıdiń «Neftehımık» (Nıjnekamsk) oınasa, 1 aqpanda «Avtomobılıst» (Ekaterınbýrg) klýbymen taǵy bir márte kezdesedi.
