QHL: «Barys» reseılik «Dınamodan» jeńilip qaldy
NUR-SULTAN. QazAqparat - «Barys» búgin qurlyqtyq hokkeı lıgasyndaǵy kezekti oıynyn elordada Reseıdiń «Dınamo» (Máskeý) komandasyna qarsy ótkizdi, dep habarlaıdy QazAqparat tilshisi.
Eki komanda búginge deıin 25 márte kezdesti. Onyń 10-y «Barystyń» basymdyǵymen aıaqtaldy. Qalǵanynda reseılik klýbtyń mereıi ústem boldy.
Byltyrǵy maýsymda komandalar eki márte sheberlik baıqasty. Onda ekeýinde de reseılik klýb jeńiske jetken bolatyn.
Aıta keterligi, sońǵy úsh kezdesýde qazaqstandyq hokkeıshiler búgingi qarsylasyna ese jiberip qoıǵan.
Búgingi kezdesýde aıdyn ıeleri oıyn tizginin qolyna aldy. Nátıjesinde elordalyq hokkeıshi Darren Dıts 2-mınýtta «Barysty» alǵa shyǵardy. Al 5-mınýtta «Dınamo» hokkeıshisi Dmıtrıı ıAshkın tarazy basyn teńestirdi. Oıynnyń 9-mınýtynda «Barys» taǵy alǵa shyqty. Goldyń avtory - Kertıs Valk.
Ekinshi kezeńde reseılik hokkeıshiler gol soǵatyn múmkindikti izdedi. Olar 28-mınýtta óz degenine jetti. Ony Teemý Pýlkkınen óziniń enshisine jazdy. Budan keıin «Barys» taǵy eki shaıba soǵyp ketti. Oıynnyń 31-mınýtta Lınýs Vıdell mergendik tanytsa, 37-mınýtta Darren Dıts kezdesýdegi ekinshi goldyń avtory atandy.
Úshinshi kezeńde «Dınamo» eki shaıba soǵyp ketti. Vadım Shıpachev 51, 59-mınýttarda mergendik tanytty. Oıyn overtaımǵa ulasty. Onda «Dınamo» jeńis shaıbasyn soǵyp, bıylǵy maýsymdaǵy alǵashqy jeńisine qol jetkizdi. Osylaısha «Barys» qarsylasynan 4:5 esebimen súrindi.
«Barys» bıylǵy maýsymda tórt oıyn ótkizdi. Aldymen Latvııada «Dınamo» (Rıga) klýbyn 3:2 esebimen tize búktirdi. Odan keıin Belarýsta «Dınamo» (Mınsk) komandasyna overtaımda 4:5 esebimen jeńildi.
Úshinshi kezdesýinde Reseıde TsSKA (Máskeý) klýbyna 1:3 esebimen ese jiberip, elordada Qytaıdyń «Kýnlýn Red Star» komandasynan 3:2 esebimen basym tústi.
Endi «Barys» elordada 14 qyrkúıekte Reseıdiń TsSKA (Máskeý), 18 qyrkúıekte Latvııanyń «Dınamo» (Rıga) klýbtarymen oınaıdy.
