QHL: «Barys» pleı-off satysynda úshinshi jeńisine jetti
NUR-SULTAN. QazAqparat - Búgin elordalyq «Barys» Reseıdiń «Metallýrg» (Magnıtogorsk) komandasyndaǵy qurlyqtyq hokkeı lıgasyn pleı-off satysyndaǵy tórtinshi kezdesýin ótkizdi, dep habarlaıdy QazAqparat tilshisi.
Budan burynǵy úsh kezdesýdiń ekeýinde «Barys» jeńiske jetse, bireýinde «Metallýrgtiń» mereıi ústem boldy. «Barys» aldymen elordada qarsylasynan 4:0 esebimen basym tússe odan keıin 0:3 esebimen jeńilip qaldy. Al Magnıtogorskide ótken alǵashqy kezdesýde elordalyq klýb 2:1 esebimen jeńiske jetti
Búgingi kezdesýde eki komandanyń da belsendiligi aıqyn ańǵarylyp turdy. «Metallýrg» jeńiske jetken jaǵdaıda oıyndar serııasynda tarazy basyn teńestiretin. Al «Barys» basym tússe, pleı-off satysynyń kelesi kezeńine jaqyndaı túsedi. Sondyqtan qos komanda da alǵa qaraı umtyldy.
Oıynnyń 19-mınýtynda «Barys» hokkeıshisi Anton Sagadeev qarsylas komanda qaqpashysyn qapy qaldyrdy. Ekinshi kezeńde komandalar bir-biriniń qaqpasynan sańylaý taba alǵan joq.
Úshinshi kezeńniń 56-mınýtynda elordalyq hokkeıshi Dastın Boıd jeńis shaıbasyn soqty. Osylaısha elordalyq klýb 2:0 esebimen jeńdi.
Endi elordada 9 naýryz kúni taǵy bir oıyn ótkiziledi. Jarys talaby boıynsha kezeńniń atalmysh satysy komandanyń bireýi tórt jeńiske jetkenge deıin jalǵasady.
