QHL: «Barys» pleı-off satysyn jeńispen bastady
NUR-SULTAN. QazAqparat - Búgin elordalyq «Barys» qurlyqtyq hokkeı lıgasy pleı-off satysynda Reseıdiń «Metallýrg» (Magnıtogorsk) komandasymen alǵashqy kezdesýin ótkizdi, dep habarlaıdy QazAqparat tilshisi.
Aıta keterligi, «Barys» qurlyqtyq hokkeı lıgasyna bıyl 12 márte qatysty. Sonyń onynda pleı-off satysynda baq synady. 2014, 2017, 2019 jyldarda jarystyń ekinshi kezeńine shyqty. Sondyqtan bıyl pleı-off kezeńinde odan da joǵary jetistikti baǵyndyrý alǵa maqsat etip qoıylyp otyr.
Elordalyq klýb alǵashqy mınýttan oıyn tizginin qolǵa alýǵa tyrysty. Nátıjesinde Kertıs Valk 13-mınýtta «Barys» komandasyn alǵa shyǵardy. Budan keıin qos komandanyń da esepti ózgertetin múmkindigi bolǵan edi. Degenmen tablodaǵy esep birinshi kezeńniń sońyna deıin ózgerissiz qaldy.
Ekinshi kezeń de tartysty órbidi. Oıynnyń 28-mınýtynda qazaqstandyq komanda esepti ulǵaıta tústi. «Barys» sapynan 28-mınýtta Atte Ohtamaa alystan soqqy jasap, qarsylas komanda qaqpashysyn qapy qaldyryp ketti.
Úshinshi kezeńde komandalar shabyldy kóbirek uıymdastyrdy. Al 59-mınýtta elordalyq Iıro Pakarınen mergendik tanytty. Oıynnyń bitýine 49 sekýnd qalǵanda «Barys» hokkeıshisi Darren Dıts taǵy bir shaıba soǵyp ketti.
Oıyn barysynda reseılik hokkeıshiler dóreki qımylymen kózge tústi. Nátıjesinde qos komanda oıynshylary birneshe márte bir-birine qol jumsaýǵa májbúr boldy. Osylaısha Oıynda elordalyq klýb 4:0 esebimen jeńiske jetti. «Barys» pleı-off satysyn jeńispen bastady.
Jarys talaby boıynsha kezeńniń atalmysh satysynda komandanyń bireýi tórt jeńiske jetkenge deıin sozylady. Endi eki komanda 3 naýryzda elordada taǵy bir oıyn ótkizedi. Al 5 jáne 7 naýryz kúnderi eki match Magnıtogorsk qalasynda bolady. Qajet bolǵan jaǵdaıda qosymsha oıyndar 9, 11, 13 naýryz kúnderi oınalady.
