QHL: «Barys» pen «Torpedo» jeńimpazy jetinshi oıynda anyqtalady
ASTANA. QazAqparat - Qurlyqtyq hokkeı lıgasy pleı-off kezeńindegi elordalyq «Barys» pen Nıjnıı Novgorodtyń «Torpedo» komandalary arasyndaǵy jeńimpaz jetinshi kezdesýde anyqtalatyn boldy, dep habarlaıdy QazAqparat tilshisi.
Eki komanda arasyndaǵy pleı-off kezeńindegi oıyndar serııasy 3:3 esebimen teń bolyp otyr. Eki klýb ta óz aıdynyndaǵy kezdesýlerde jeńiske jetip, jeńimpazdy anyqtaýdy jetinshi oıynǵa qaldyrdy.
Búgingi oıyn Nıjnıı Novgorod qalasynda boldy. Aıdyn ıeleri birinshi kezeńde bir shaıba soqty. «Torpedo» hokkeıshisi Denıs Parshın mergendigin tanytty. Ekinshi kezeńde «Barys» sapynan Pavel Akolzın tarazy basyn teńestirdi. Degenmen budǵan keıin «Torpedo» hokkeıshileri jeńiske jetýge barynshy tyrysty.
Sebebi, bul joly «Barys» basym túsken jaǵdaıda oıyndar serııasy toqtatylatyn edi. «Barys» jarystyń kelesi satysyna joldama alatyn. Osyny jaqsy túsingen aıdyn ıeleri esepti ulǵaıtýǵa barynsha tyrysty.
Aldymen Artem Alıaev 30-mınýtta «Torpedony» taǵy alǵa shyǵarsa, 34-mınýtta Vladımır Galýzın esepti ulǵaıta tústi. «Barys» qatarynda sońǵy úsh mınýtta qaqpashy Henrık Karllsonnyń ornyna altynshy oıynshy shyqty. Degenmen bizdiń komandanyń tarazy basyn teńestirýge múmkindigi bolǵan joq.
Kezdesý 3:1 esebimen «Torpedonyń» basymdyǵymen aıaqtaldy. Bul juptyń jeńimpazy 10 naýryzda anyqtalady. Atalmysh oıyn Astana qalasynda ótkiziledi. Jeńimpaz atanǵan komanda jarystyń kelesi satysynda Ombynyń «Avangard» klýbymen kezdesedi.
Esterińizge sala ketelik, 6 naýryzda «Barys» atalmysh qarsylasyn 3:1 esebimen tize búktirgen edi.
