QHL: «Barys» pen «Neftehımık» oıynyn qaıdan kórýge bolady
NUR-SULTAN. QazAqparat - Búgin elordada «Barys» qurlyqtyq hokkeı lıgasynda Reseıdiń «Neftehımık» (Nıjnekamsk) komandasyn qabyldaıdy, dep habarlaıdy QazAqparat tilshisi.
«Barys» pleı-off kezeńine beriletin joldama taǵdyryn búgin sheshýi múmkin. Elordalyq komanda jeńiske jetip, Qytaıdyń «Kýnlýn Red Star» klýby Reseıdiń «Traktorynan» jeńilgen jaǵdaıda bul saýaldyń jaýaby tabylady. Al «Neftehımık» úshin pleı-offqa shyǵý múmkindigi qıyn tıip tur.
Eki komanda búgingi kúnge deıin 25 márte kezdesken. Onyń 13-i «Barystyń» basymdyǵymen aıaqtalsa, qalǵanynda reseılik hokkeıshiler jeńiske jetti. Komandalar bıylǵy básekede bir márte kezdesip úlgerdi. 2020 jyldyń 8 qańtarynda qazaqstandyq klýb atalmysh qarsylasyn Nıjnekamskide 5:1 esebimen tize búktirdi. Qazir qurlyqtyq hokkeı lıgasynyń jalpy týrnır kestesinde «Barys» 7, «Neftehımık» 18 orynda tur. Al shyǵys konferentsııasynda qazaqstandyq hokkeıshiler 3, reseılik klýb 10 orynda keledi.
«Barys» pen «Neftehımık» komandalary arasyndaǵy kezdesý búgin elorda ýaqytymen 19.30-da bastalady. Oıyn QazSport telearnasynan tikeleı efırde kórsetiledi.
«Barys» budan buryn Reseıdiń «Avtomobılıst» komandasynan basym tústi.
