QHL: «Barys» pen «Avangard» arasyndaǵy oıyndar serııasy teńesti
ASTANA. QazAqparat - Elordalyq «Barys» Ombynyń «Avangard» (Reseı) komandasymen qurlyqtyq hokkeı lıgasy shyǵys konferentsııasynda pleı-off kezeńiniń jartylaı fınalynyń ekinshi oıynyn ótkizdi, dep habarlaıdy QazAqparat tilshisi.
Esterińizge sala ketelik, eki komandanyń jarystyń atalmysh satysyndaǵy alǵashqy oıynynda ombylyq klýb 3:1 esebimen jeńiske jetti. Osylaısha olar astanalyq hokkeıshilerdi jeti oıyn qatarynan qapy qaldyryp ketken edi.
Búgingi kezdesýde «Barys» oıyn tizginin qolǵa aldy dep aıtýǵa negiz bar. Kezdesý barysynda olar qarsylastar qaqpasy mańynda jıi boı kórsetip jatty. Dese de birinshi kezeńde eki komanda bir-biriniń qaqpasynan sańylaý taba alǵan joq.
Ekinshi kezeńde de aıdyn ıeleri taǵy da alǵa qaraı umtyldy. Biraz ýaqyt boıy «Avangard» mańynda boı kórsetip jatty. Alǵashqy shaıbany «Barys» sapynan Vıktor Svedbergtiń pasynan keıin Djessı Bleker saldy. Bul oıynnyń 29-mınýty bolatyn. Al 34-mınýtta Dmıtrıı Grents pen Egor Shalapovtyń pasynan keıin astanalyq Dastın Boıd esepti ústemeleı tústi. Esep 2:0. Budan keıin «Avangard» jigitteri shabýylǵa shyqty. Alaıda olar degenderine jete alǵan joq.
Úshinshi kezeń eki komandanyń shabýylymen órbidi. Nátıjesinde 44-mınýtynda komandalasy Teılor Bektiń pasyn «Avangard» hokkeıshisi Sergeı Shýmakov sheber paıdalanyp, esep aıyrmasyn qysqartty. Bul shaıba astanalyq hokkeıshilerdiń saǵyn syndyra qoıǵan joq. Arada nebári eki mınýt ótkende Brendon Bochenskı mergendik tanytty. Esep 3:1. Al 54-mınýtta aıdyn ıeleri esepti ulǵaıta tústi. Bul joly Dastın Boıd taǵy da qanjyǵasyn maılady. Al 58-mınýtta «Avangard» taǵy da esep aıyrmasyn qysqartýǵa múmkindik aldy. Esep 4:2. Osylaısha «Barys» pen «Avangard» komandalary arasyndaǵy oıyndar serııasy teńesti. Sondaı-aq, astanalyq klýb atalmysh qarsylasyn jeti oıynǵa sozylǵan jeńilister serııasyn toqtatty.
Aıta keterligi, sońǵy jeti oıynnan beri bizdiń komanda atalmysh qarsylasyn tize búktire almaı keledi. Sońǵy márte «Barys» ombylyq klýbty 2017 jyldyń 10 qazanynda 4:3 esebimen jeńgen edi .
Endigi eki oıyn 18 jáne 20 naýryzda Balashıha qalasynda ótedi. Eskerte keterligi, Omby qalasyndaǵy hokkeı arenasy mundaı deńgeıdegi oıyndar ótkizýge daıyn emes. Sondyqtan «Avangard» óz oıyndaryn Balashıha qalasynda ótkizýge májbúr. Tórt kezdesýde jeńimpaz anyqtalmaǵan jaǵdaıda komandalar 22 naýryzda Astanada, 24 naýryzda Balashıhada sheberlik baıqasady. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.
Tórt kezdesýde jeńimpaz anyqtalmaǵan jaǵdaıda komandalar 22 naýryzda Astanada, 24 naýryzda Balashıhada sheberlik baıqasady. Alty oıynda jeńimpaz belgili bolmasa sońǵy kezdesý taǵy da Astanada 28 naýryzda ótedi.
«Barys» jarystyń bul satysyna óz tarıhynda úshinshi márte shyǵyp otyr. Elordalyq klýb 2013/2014 jáne 2016/2017 jylǵy kezeńderde jankúıer qaýymyn osyndaı joǵary jetistigimen qýantqan edi. Degenmen ekeýinde de odan árige asa alǵan joq.
