QHL: «Barys» overtaımda «Spartaktan» basym tústi
NUR-SULTAN. QazAqparat - Elordalyq «Barys» qurlyqtyq hokkeı lıgasynda búgin Reseıde Máskeýdiń «Spartak» komandasymen kezdesti, dep habarlaıdy QazAqparat tilshisi.
Oıyn barysy tartysty órbidi. Kezdesýdiń 3-mınýtynda reseılik hokkeıshi Sergeı Shırokov esep ashty. Qos komanda shabýyl shebinde kóbirek boı kórsetti. Degenmen birinshi kezeńde tablodaǵy esep ózgerissiz qaldy.
«Barys» hokkeıshileri ekinshi kezeńdi sátti bastady. Aldymen 21-mınýtta Nıkıta Mıhaılıs tarazy basyn teńestirdi. Al 23-mınýtta Darren Dıts elordalyq klýbty alǵa shyǵardy. Oıynnyń 25-mınýtta «Spartak» sapynan Lýkash Radıl mergendik tanytty.
Negizgi ýaqyt 2:2 esebimen teń aıaqtalyp, oıyn overtaımǵa ulasty. Overtaımda «Barys» sapynan Darren Dıts jeńis shaıbayn soqty.
Eki komanda buǵan deıin 22 márte kezdesti. Onyń 15-i «Barystyń» jeńisimen aıaqtalsa, qalǵanynda reseılik klýbtyń mereıi ústem boldy.
Endi «Barys» 16 qazanda Reseıdiń Qazan qalasynda «Ak Bars» komandasymen kezdesedi. Odan keıin 21 qazanda elordada Fınlıandııanyń «Iokerıt» komandasyn qabyldaıdy.
