QHL: «Barys» overtaımda Máskeýdiń «Dınamo» komandasynan jeńildi
NUR-SULTAN. QazAqparat - Búgin elordada «Barys» qurlyqtyq hokkeı lıgasyndaǵy kezekti kezdesýinde Reseıdiń «Dınamo» (Máskeý) komandasyn qabyldady, dep habarlaıdy QazAqparat tilshisi.
«Dınamo» qurlyqtyq hokkeı lıgasyndaǵy tájirıbeli komandanyń biri sanalady. Reseılik klýb atalmysh dodada 2011/12, 2012/13 jyldarda jeńimpaz atanǵan. Eki komanda arasyndaǵy kezdesýlerde «Dınamo» kóbirek jeńiske jetken. Búgingi kúnge deıin reseılik klýb «Baryspen» ótkizgen 24 oıynda 14 márte jeńiske jetip, qalǵanynda qarsylasyna ese jibergen.
Komanda bıyl da bir márte kezdesp úlgerdi. 2019 jyldyń 11 qarashasynda elordalyq klýb Máskeýde aıdyn ıelerine overtaımda 2:3 esebimen jol bergen edi. Sondyqtan «Barys» sol ketken eseni búgingi oıynda qaıtarýǵa tyrysty.
Kezdesý eki komandanyń alma-kezek shabýylymen bastaldy. Dese de birinshi kezeńde reseılik komanda «Barys» qaqpasyna eki shaıba soǵyp ketti. Ony 9-mınýtta Andreı Mıronov, 12-mınýtta Dmıtrıı ıAshkın ózderiniń enshisine jazdy.
Ekinshi kezeńde elordalyq hokkeıshiler oıyn tizginin óz qolyna alýǵa tyrysty. Nátıjesinde 24-mınýtta Dastın Boıd esep aıyrmasyn qysqartty. Al 37-mınýtta elordalyq Anton Sagadeev tarazy basyn teńestirdi.
Úshinshi kezeńde «Barys» qarqyndy oıyn kórsetti. Oıynnyń 44-mınýtynda Roman Starchenko elordalyq klýbty alǵa shyǵardy. Degenmen 56-mınýtta «Dınamo» hokkeıshisi Andre Peterson mergendik tanytty. Negizgi kezeńde 3:3 esebimen aıaqtalyp, oıyn overtaımǵa ulasty. Overtaımda «Dınamo» Vadım Shıpachev jeńis shaıbasyn soqty. Kezdesýde «Barys» qarsylasynan 3:4 esebimen jeńilip qaldy.
Budan buryn «Barys» elordada Reseıdiń SKA (Sankt-Peterbýrg) komandasynan jeńilip qalǵan edi.
Endi «Barys» eki oıyn ótkizedi. Aldymen 29 jeltoqsanda Reseıdiń «Avtomobılıst» (Ekaterınbýrg) komandasymen kezdesse, 30 jeltoqsanda Qytaıdyń «Kýnlýn Red Star» komandasymen muz aıdynǵa shyǵady.
