QHL: «Barys» Máskeýde «Spartaktan» basym tústi
ASTANA. QazAqparat - Elordalyq «Barys» qurlyqtyq hokkeı lıgasyndaǵy kezekti oıynyn Máskeýdiń «Spartak» komandasymen kezdesti, dep habarlaıdy QazAqparat tilshisi.
Eki komanda jalpy týrnır kestesinde qatarlas keledi. Olar bıylǵy qurlyqtyq hokkeı lıgasynda alǵash ret kezdeip otyr. Atalmysh týrnırdiń jalpy tarıhynda qos komanda búgingi kúnge deıin 19 márte baq synasqan. Onyń 12-i «Barystyń» basymdyǵymen aıaqtalsa, qalǵan jeńis «Spartaktyń» enshisine jazyldy.
Búgingi kezdesýde aıdyn ıeleri esep ashty. Ony 18-mınýtta «Spartak» hokkeıshisi Artem Voronın oryndady. Al ekinshi kezeńde 30-mınýtta Anatolıı Nıkontsov esepti ústemeleı tústi. Esep 2:0. «Spartak» osylaısha ózderiniń basymdyǵyn baıqatqan. Arada kóp uzamaı «Barys» sapynan Kevın Dallman mergendik tanytty.
Úshinshi kezeńde bizdiń jigitter ózderin jaqsy qyrynan tanyta bildi. Aldymen 47-mınýtta Roman Starchenko tarazy basyn teńestirse, 53-mınýtta astanalyq hokkeıshi Darren Dıts óz komandasyn alǵa shyǵardy. Esep 3:2. «Barys» alǵa shyqty. Oıyn sońyna deıin osy esep ózgergen joq.
Búgingi kezdesýden keıin «Barys» týrnır kestesinde joǵarylaı tústi. Elordalyq klýb jetinshi orynǵa kóterildi.
Esterińizge sala ketelik, «Barys» komandasy budan buryn Chelıabide «Traktordy» 3:0 esebimen jeńse, odan keıin Ombyda «Avangardtan» býllıtte 3:4 esebimen ese jiberdi.
Endi «Barys» 5 qańtarda Sochıde jergilikti «Sochı» komandasymen kezdesedi. Al 8 qańtarda Astanada Habaroskiniń «Amýryn» qabyldaıdy.
