QHL: «Barys» Máskeýde TsSKA komandasyn tize búktirdi
ASTANA. QazAqparat - Qurlyqtyq hokkeı lıgasynyń (QHL) kezekti kezdesýin Astananyń «Barysy» Máskeýde TsSKA komandasymen ótkizdi, dep habarlaıdy QazAqparat tilshisi.0j
Máskeýlikter osynyń aldynda QHL-dyń jalpy kestesi men Batys konferentsııasynda 86 upaımen kósh bastasa, astanalyqtardyń (72 upaı) Shyǵys tobynda ekinshi oryn alatyndaı múmkindikteri bar.
Shyǵys konferentsııasynda «Avtomobılıst» (Ekaterınbýrg) 83 upaımen qara úzip ketse, odan keıin «Avangardtyń» (Omby) 75, al «Aq Barys» (Qazan), «Metallýrg» (Magnıtogorsk) jáne «Barys» komandalarynyń 72-den upaılary bar. Oǵan qosa elordalyqtar ombylyqtardan 5, qalǵan ekeýinen bir oıyndy kem ótkizgen, demek, olardy basyp oza alady.
Chempıonattyń birinshi bóliginde astanalyqtar óz qaqpalaryna kóbirek gol ótkizip alyp júrse, sodan keıin shabýyldaýmen birge qorǵanysty da nyqtap, sonyń nátıjesinde upaı qorjynyn molaıta aldy.
Budan eki kún buryn QHL-daǵy kósh bastaýshylardyń biri - SKA (Sankt-Peterbýrg) komandasymen terezesi teń oıyn órnegin kórsetip, tek býllıtte ǵana ese jibergen Andreı Skabelkanyń shákirtteri máskeýlik armııashylarmen básekeni de sátti bastady.
TsSKA-nyń qaqpashysy Ilıa Sorokın kanadalyq legıoner Mettıý Frettınniń soqqysyn qaıtaryp úlgergenimen, shaıbaǵa birinshi jetken «Barystyń» kapıtany Brendon Bochenskı matchtyń 19-sekýndynda esep ashty - 1:0. Bul QHL-daǵy osy maýsymdaǵy eń tez soǵylǵan gol edi.
Birinshi kezeń barysynda máskeýlikter eki márte san basymdylyǵyna ıe bolǵanymen, odan eshteńe shyǵara almady. Esesine birinshi kezeń bitýge segiz sekýnd qalǵanda, qorǵaýshylar arasynda nátıjeli pas berýmen ári mergendigimen erekshe kózge túsip júrgen kanadalyq Darren Dıts (pas bergen M.Frettın) dál soqqymen esepti 2:0-ge jetkizdi.
Ekinshi kezeńdi de qonaqtar tamasha bastady. Taǵy bir kanadalyq Patrıs Kormeden pas alǵan shvetsııalyq shabýylshy Andre Petersson mergendik tanytty - 3:0. Іle-shala Vıktor Svedberg pen Dmıtrıı Shevchenkonyń kómegimen qorǵaýshy Alekseı Maklıýkov alystan dál soqty - 4:0. Bul jýyrda sábıli bolǵan A.Maklıýkovtyń sońǵy jeti kezdesýdegi úshinshi goly edi, munyń qorǵaýshy úshin jaqsy kórsetkish ekeni anyq.
Kezdesý barysynda «Barystyń» qaqpashysy Henrık Karlsson qaýipti soqqylardy qaıtara aldy. Degenmen tóreshilerdiń sheshimimen san basymdylyǵyna ıe bolǵannan keıin máskeýlik shabýylshy Kırıll Kaprızov esepti qysqartty - 1:4. Sosyn shabýylshy Anton Sagadeev (ol KHL-daǵy júzinshi oıynyn ótkizdi) aıdynnan qýylǵan sátte máskeýlikterden shaıbany «urlap» alǵan B.Bochenskı qaqpaǵa jeke dara shyqqanymen, I.Sorokındi aldaı almady.
Úshinshi kezeńde máskeýlikter alǵa umtylyp baǵyp, Anton Slepyshev 55-mınýtta taǵy bir gol soqty - 2:4. Match sońyna taman TsSKA qaqpashysyn altynshy oıynshyǵa almastyrǵan sátte B.Bochenskıge bos qalǵan qaqpany dál kózdeý qıynǵa soqqan joq - 5:2.
Osylaısha astanalyqtar máskeýlikterdi 5:2 esebimen utyp, myqty komandalardyń mysyn basýǵa bolatyndyǵyn dáleldedi.
Bir aıtatyn jaıt, astanalyqtar TsSKA komandasyn Máskeýde 2012 jyldyń qyrkúıeginen beri utyp kórmegen eken. Sondyqtan bul jeńistiń bási joǵary.
Osy matchtan keıin 74 upaı jınap, Shyǵys konferentsııasynda úshinshi orynǵa kóterilgen «Barys» 29 qańtarda Novosibirde jergilikti «Sıbır» klýbymen sheberlik baıqasady. Sodan keıin Astanaǵa oralyp, qańtardyń sońǵy kúni Sankt-Peterbýrgtiń SKA komandasynan qarymta qaıtarýǵa tyrysyp kórmek. Máskeýlikter «Barystan» utylǵannan keıin SKA birinshi orynǵa shyqty.
Eske sala keteıik, budan buryn «Barystyń» kósh bastaýshy komandadan utylyp qalǵanyn jazǵan bolatynbyz.
