QHL: «Barys» «Lokomotıvten» jeńilip qaldy

Eki komanda bıyl bir márte kezdesken. ıAroslavlde ótken oıynda aıdyn ıeleri «Barystan» 5:3 esebimen basym tústi. Komandalar buǵan deıin 16 márte match ótkizgen. Onyń 12-si «Lokomotıvtiń» basymdyǵymen aıaqtalsa, qalǵanynda «Barys» jeńiske jetken.

Aıta keterligi, sońǵy eki kezdesýde reseılik klýb myqtylyǵyn kórsetip keledi. Sońǵy ret bizdiń komanda 2017 jyldyń 27 qyrkúıeginde óz aıdynynda búgingi qarsylasyn 6:1 esebimen oısyrata jeńgen bolatyn.

Búgingi kezdesýde eki komanda da shabýylǵa ıek artatynyn alǵashqy mınýttan baıqatty. «Lokomotıv» osyndaı sátterdiń birinde bizdiń qaqpaǵa shaıba soǵyp ketti. Ol Stepan Sannıkovtyń enshisine jazyldy. Budan keıin eki komanda da esepti ózgertýge tyrysty. Degenmen birinshi kezeńde sol esep saqtalyp qaldy.

Ekinshi kezeńde tartys odan ári qyza tústi. Aldymen «Barys» tarazy basyn teńestirdi. Ony Roman Starchenko 25-mınýtta óziniń enshisine jazdy. Aıdyn ıeleri bul esepti ustap tura alǵan joq. «Barys» hokkeıshisi Andre Peterson dóreki qımylyna baılanysty eki mınýtqa aıdynnan qýyldy. Oıynshylar sany basymdyǵyn paıdalanǵan «Lokomotıv» gol soǵyp bul kezdesýde taǵy da alǵa shyqty. Bul sátte «Lokomotıv» hokkeıshisi Egor Averın qaqpany dál kózdeı bildi. Jalpy, ekinshi kezeńde «Barys» hokkeıshileri dórekiligimen kózge túsip, aıdynnyn jıi qýyldy. Atap aıtqanda, Andre Peterson eki, Mettıý Frettın men Patrıs Korme bir-bir márte osylaısha jazalandy.

Úshinshi kezeńde «Barys» tarazy basyn teńestirýge umtyldy. Qarsylasynan basym oınady. Degenmen esepti ózgerte alǵan joq. «Lokomotıv» «Barystan» 2:1 esebimen basym tústi.

Buǵan deıin «Barys» óz alańynda 18 jeltoqsanda Cherepovetstiń «Severstal» komandasynan 3:0 esebimen basym tústi.

Endi «Barys» óz aıdynynda bir oıyn ótkizedi. 22 jeltoqsanda Vladıvostoktyń «Admıral» komandalarymen kezdesedi. Al 28 jeltoqsanda syrt aıdynda Chelıabiniń «Traktorymen» sheberlik baıqasady.