QHL: «Barys» qytaılyq komandany jeńdi
ASTANA. QazAqparat - Elordalyq «Barys» búgin Qytaıdyń «Kýnlýn Red Star» komandasymen kezdesti, dep habarlaıdy QazAqparat tilshisi.
Eki komanda búginge deıin qurlyqtyq hokkeı lıgasynda alty márte sheberlik baıqasty. Qýanarlyǵy, onyń tórteýinde «Barys» jigitteri basym tússe, qalǵanynda qytaılyq hokkeıshiler jeńiske jetken.
«Kýnlýn Red Star» komandasynyń qurylǵanyna bıyl úshinshi jyl tolady. Ázirge joǵary tabystarǵa qol jetkize qoıǵan joq. Bıyl da jankúıerlerin jaqsy oıyn órnegimen qýanta almaı keledi. Olar jarystyń pleı-off satysyna shyǵa almaıtyn sekildi. Qorjynynda qazir nebári 46 upaı bar. Týrnır kestesinde 20-orynda tur. Soǵan qaramastan árbir kezdesýde qarsylas yǵyna jyǵyla qoıýdy qalamaıdy.
Bıyl eki komanda eki márte kezdesip úlgerdi. Aldymen 12 jeltoqsanda «Barys» atalmysh qarsylasyn 4:1 esebimen tize búktirdi. Al 14 qańtarda qytaılyq hokkeıshiler Astanada bizdiń komandadan 1:3 esebimen ese qaıtardy.
Búgingi kezdesý tartysty bastaldy. Qytaılyq klýb hokkeıshileri bizdiń qaqpadan sańylaý izdeýge tyrysty. Shabýyl shebinde jıi boı kórsetti. Degenmen oǵan «Barys» jigitteri qınala qoıǵan joq. Olarǵa laıyqty toıtarys berdi. Shabýyl tizginin qolǵa alýǵa tyrysty. Alǵashqy shaıbany aıdyn ıeleri soqty. Bizdiń komandadan Pavel Akolzın 14-mınýtta qanjyǵasyn maılady.
Ekinshi kezeńde «Barys» hokkeıshileri Qytaı komandasynyń qaqpashyna qaýipti sátterdi jıi uıymdastyrdy. Oıynnyń 24-mınýtynda bizdiń komandadan Dastın Boıd shaıba soqqan edi. Qytaılyq qaqpashyǵa bóget jasaldy degen jeleýmen tóreshiler beıneqaıtalaýǵa júginýge májbúr boldy. Sosyn tóreshiler soǵylǵan shaıbany sanamaı tastady. Dese de kóp uzamaı «Barys» sapynan Roman Starchenko mergendik tanytty. Bul oıynnyń 29-mınýty bolatyn.
Úshinshi kezeńde de eki komanda tartysty oıyn ótkizdi. «Barys» sapynan 49-mınýtta Pavel Akolzın búgingi kezdesýdegi ekinshi shaıbasyn soqty. Degenmen arada bir mınýtta ótpesten qytaılyq hokkeıshiler esep aıyrmasyn qysqarta aldy. Ol 50-mınýtta Djastın Fonteın óziniń enshisine jazdy. Oıynda «Barys» 3:1 esebimen jeńiske jetti.
«Barys» buǵan deıin 12 aqpanda Astanada Novosibirdiń «Sıbır» komandasynan 5:2 esebimen basym tústi.
«Barys» endi Astanada bir oıyn ótkizedi. Bizdiń hokkeıshiler 16 aqpanda Ombynyń «Avangard» klýbyn qabyldaısa, odan keıingi úsh kezdesýdi syrt aıdynda ótkizedi. Aldymen 18 aqpanda Vladıvostokta «Admıral», 20 aqpanda Habarovskide «Amýr» komandalarymen oınaıdy. Qurlyqtyq hokkeı lıgasyndaǵy sońǵy kezdesýin «Barys» búgingi qarsylasy - «Kýnlýn Red Starmen» 22 aqpanda ótkizedi. Odan keıin jarystyń pleı-off kezeńi bastalady.
