QHL: «Barys» Qytaı komandasyn jeńdi
NUR-SULTAN. QazAqparat - Qurlyqtyq hokkeı lıgasyndaǵy kezekti oıynynda elordalyq «Barys» komandasy Qytaıdyń «Kýnlýn Red Star» klýbymen kezdesti, dep habarlaıdy QazAqparat.
Bul oıyn Qytaıdyń Shenchjen qalasynda Ýnıversıadanyń sporttyq ortalyǵynda ótkizildi.
Esterińizge sala ketelik, 8 qyrkúıekte ótkizilgen kezdesýde «Barys» atalmysh qarsylasynan 0:1 esebimen jeńilip qalǵan edi. Sondyqtan qazaqstandyq ujym sol ketken eseni qaıtarýǵa tyrysty.
Qos komanda alǵashqy kezeńde shabýyl shebine kóbirek kóńil bóldi. Degenmen bir-biriniń qaqpasynan sańylaý taba alǵan joq.
Ekinshi kezeń óte tartysty órbidi. Nátıjesinde qos qaqpaǵa tórt shaıba soǵyldy. Alǵashqy eki shaıbany «Barys» hokkeıshileri soqty. Ony 23-mınýtta Darren Dıts, 27-mınýtta Adam Helýka oryndady. Dese de odan keıin aıdyn ıeleri namysqa tyrysyp, tarazy basyn teńestirip ketti. «Kýnlýn Red Star» sapynan aldymen 34-mınýtta Brendon Ip, 39-mınýtta Itan Verek qanjyǵasyn maılady. Osylaısha ekinshi kezeń 2:2 esebimen teń aıaqtaldy.
Úshinshi kezeńde «Barys» taǵy da shıraq qımyldaı bildi. Nátıjesinde 47-mınýtta Nıkıta Mıhaılıs óz komandasyn alǵa shyǵardy. Osylaısha «Barys» qarsylasyn 3:2 esebimen jeńdi.
«Barys» endigi eki oıynyn syrtta ótkizedi. Aldymen 11 qyrkúıekte Habarovskide «Amýrmen» kezdesse, 13 qyrkúıekte Vladıvostkota «Admıralmen» oınaıdy. Odan keıin 17 qyrkúıekte Almaty qalasynda Reseıdiń «Spartak», 20 qyrkúıekte Chelıabiniń «Traktor» komandalaryn qabyldaıdy.