QHL: «Barys» kóshbasshy komandadan jeńilip qaldy
ASTANA. QazAqparat - Elordalyq «Barys» búgin qurlyqtyq hokkeı lıgasyndaǵy kezekti kezdesýinde Sankt-Peterbýrgte jergilikti SKA komandasymen kezdesti, dep habarlaıdy QazAqparat tilshisi.
Armııashylar klýby qurlyqtyq hokkeı lıgasyndaǵy tájirıbeli komandanyń biri sanalady. Búgingi kúnge deıin atalmysh týrnırde eki márte Gagarın kýbogyna qol jetkizdi. Alǵash ret 2014-2015 jylǵy kezeńde osyndaı jetistikke qol sozsa, byltyr da dál osyndaı tabysyn qaıtalady.
Eki komanda buǵan deıin 19 márte kezdesken edi. «Barys» nebári tórt márte jeńiske jetse, qalǵanynda SKA qanjyǵasyn maılady. Bizdiń hokkeıshiler sońǵy márte atalmysh qarsylasyn 2015 jyldyń 28 qazanynda 4:2 esebimen tize búktirgen edi. Sodan bergi bes kezdesýde búgingi qarsylasymyz basymdyq tanytty. SKA komandasy bıyl da kóshbasshylar qatarynda keledi. Máskeýdiń TsSKA klýbymen alǵashqy eki oryndy bólisip otyr.
Aıdyn ıeleri bul kezdesýde de jeńiske jetý jolyn izdedi. Kezdesý bastalysymen oıyn tizginin qolǵa alýǵa umtyldy. Alǵashqy goldy da aıdyn ıeleri soqty. Olardyń sapynan 15-mınýtta Anton Belov mergendik tanytty. Budan keıin qarsylasymyz bizdiń qaqpadan sańylaý taba alǵan joq.
Ekinshi kezeńde «Barys» hokkeıshileri tarazy basyn teńestirýge umtyldy. Birneshe shabýyl uıymdastyrdy. Oǵan SKA komandasy da tegeýrindi qarsylyq kórsetti. Dese de 25-mınýtta Djessı Bleker shaıba soǵyp, oıyn barysyn odan ári qyzyqty ete tústi. Eki komanda da bir-biriniń qateligin izdedi. Degenmen tablodaǵy esep ekinshi kezeńde sol kúıinshe qaldy.
Úshinshi kezeń de dál sondaı kóriniste órbidi. Qos komanda tarapynan dórekilik áreketter kózge tústi. SKA sapynan 47-mınýtta Evgenıı Ketov, sálden keıin «Barys» qatarynan Andre Peterson aıdynnan qýyldy. Budan keıin «Barys» tarapynan basymdyq baıqaldy. Nátıjesinde 49-mınýtta Brendon Bochenskı aıdyn ıeleri qaqpasynan sańylaý tapty. Esep 2:1. «Barys» komandasy alǵa shyqty. Al 55-mınýtta tarazy basy taǵy da teńesti. SKA sapynan Vladıslav Gavrıkov mergendik tanytty. Esep 2:2. Oıyn overtaımǵa ulasty. Bul joly SKA komandasynyń joly boldy.
«Barys» budan buryn syrt aıdynda bir oıyn ótkizdi. 22 qańtarda Magnıtogorskide jergilikti «Metallýrgti» 3:1 esebimen basym túsken edi.
«Barys» endi eki oıyndy syrt aıdynda ótkizedi. Aldymen 26 qańtarda Máskeýde TsSKA klýbymen sheberlik baıqasady. Al 29 qańtarda Novosibirdiń «Sıbırimen» oınaıdy. Elordada 31 qańtarda búgingi qarsylasymyz - Sankt-Peterbýrgtiń SKA komandasymen taǵy bir oıyn ótkizedi.
