QHL: «Barys» komandasy «Kýnlýn Red Stardan» jeńilip qaldy
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti oıynyn Qytaıda «Kýnlýn Red Star» komandasyna qarsy ótkizdi, dep habarlaıdy QazAqparat tilshisi.
Búgingi kezdesýde «Barys» senimdi oıyn kórsete alǵan joq. Kóp jaǵdaıda qarsylastar qaqpasy mańynda qatelikke boı aldyrdy. Birinshi kezeńde qos komanda da bir-biriniń qaqpasynan sańylaý taba alǵan joq.
Ekinshi kezeńde «Kýnlýn Red Star» komandasy bir shaıbamen alǵa shyqty. Ony 28-mınýtta Itan Verek soǵyp ketti. Osylaısha aıdyn ıeleri alǵa shyqty. Budan keıin «Barys» jigitteri alǵa qaraı umtyldy. Degenmen tarazy basyn teńestirýge múmkindik bolǵan joq. Úshinshi kezeńde elordalyq hokkeıshiler birneshe márte san basymdyǵyna ıe boldy. Soǵan qaramastan esep ózgere qoımady. Osylaısha «Barys» jigitteri 0:1 esebimen jeńilip qaldy. Esterińizge sala ketelik, budan buryn «Barys» elordada eki oıyn ótkizdi. Aldymen Vladıvostoktyń «Admıralynan» 1:3 esebimen jeńilip qalsa, odan keıin Habarovskiniń «Amýr» klýbyn 3:2 esebimen tize búktirdi. «Barys» endigi úsh oıynyn syrtta ótkizedi. Aldymen Qytaı astanasy - Beıjiń qalasynda taǵy da jergilikti «Kýnlýn Red Star» komndasymen kezdesýde aıdynǵa shyǵady. Al 11 qyrkúıekte syrtta «Amýrmen» kezdesse, 13 qyrkúıekte «Admıralmen» oınaıdy.