QHL: «Barys» kezekti oıynyn Magnıtogorskide «Metallýrg» komandasymen ótkizedi
NUR-SULTAN. QazAqparat - Qurlyqtyq hokkeı lıgasynyń kezekti týrynda «Barys» Magnıtogorskide «Metallýrg» komandasymen kezdesedi, dep habarlaıdy QazAqparat tilshisi.
«Metallýrg» - QHL-daǵy kóshbasshylardyń biri. Qazirgi kezde 70 upaımen jalpy kestede jáne Shyǵys konferentsııasynda «Traktordan» keıin ekinshi orynda keledi. Elordalyqtar 46 upaımen Shyǵysta burynǵysynsha segizinshi satyda tur. Ótken týrda qos komanda 5 qańtar kúni Nur-Sultanda sheberlik baıqasty. Tótenshe jaǵdaıǵa baılanysty kórermendersiz ótken básekede aıdyn ıeleri 3:2 esebimen jeńiske jetip, mańyzdy eki upaıǵa ıe boldy. Osy oıynda «Barystyń» kapıtany Roman Starchenko QHL-daǵy óziniń 200-inshi golyn soqty. Roman - osyndaı tabysqa qol jetkizgen lıgadaǵy jetinshi oıynshy. Jalpy, ol QHL-da 739 match ótkizip, 377 (gol jáne nátıjeli pas) ball jınady. R.Starchenkoǵa klýbtyń rekordshysy Naıdjel Doýsty qýyp jetý úshin endi 17 gol soǵýy kerek. «Metallýrg» - «Barys» matchy elorda ýaqytymen saǵat 18.30-da bastalady.
