QHL: «Barys» qatarynan úshinshi márte jeńiske jetti
ASTANA. QazAqparat - Elordalyq «Barys» óz aıdynynda Novosibirdiń «Sıbır» komandasyn qabyldady, dep habarlaıdy QazAqparat tilshisi.
Eki komanda bıyl tórtinshi márte kezdesip otyr. 2018 jyldyń 28 qazanynda bizdiń klýb Astanada atalmysh qarsylasyn 5:2 esebimen jeńgen edi. Odan keıin 12 qarashada «Barys» olardan Novosibirde overtaımda 2:1 esebimen basym tústi. Al 29 qańtarda novosibirlik klýb overtaımda dál osy eseppen «Barysty» tize búktirdi.
«Sıbır» komandasy pleı-off kezeńine shyǵýǵa kúsh salatyny anyq. Sebebi, olar áli mundaı múmkindikke qol jetkize qoıǵan joq. Jalpy týrnır kestesinde 18 orynda tur. Jarys erejesine sáıkes pleı-off kezeńine alǵashqy 16 komanda shyǵady. Al «Barys» alǵa qoıǵan mundaı maqsatyn birneshe týr buryn sheship qoıǵan edi. Qazir olar týrnır kestesinde altynshy orynda keledi.
Alǵashqy kezeńde qos komanda da shabýyl shebinde jıi boı kórsetti. Ásirese, «Sıbır» jigitteri bizdiń qaqpashyny qapy qaldyrýǵa kúsh saldy. Dese de birinshi kezeńde qaqpa qulpy ashyla qoıǵan joq.
Ekinshi kezeń bastalysymen «Sıbır» hokkeıshileri esep ashty. Ony 21-mınýtta Vıktor Komarov oryndady. Alaıda olar bul esepti kóp ustap tura alǵan joq. Oıynnyń 23-mınýtynda Egor Petýhov tarazy basyn teńestirdi. Al 25-mınýtta «Barys» hokkeıshisi Dmıtrıı Shevchenko óz komandasyn alǵa shyǵardy.
Úshinshi kezeńde «Sıbır» hokkeıshileri dóreki qımyldarǵa jıi boı aldyrdy. Olardyń sapynan qatarynan eki oıynshy aıdynnan qýylǵan sáti boldy. Osyndaı sátte olar aıdynda nebári úsh oıynshymen qaldy. Bul múmkindikti «Barys» jigitteri múlt jibergen joq. Olardyń qatarynan 46-mınýtta Roman Starchenko mergendik tanytty. Dál osyndaı jaǵdaı taǵy da qaıtalandy. Qarsylas komandanyń úsh hokkeıshisi bizdiń bes oıynshyǵa qarsy tura alǵan joq. «Barys» sapynan 56-mınýtta Brendon Bochenskı shaıba soqty. Al 57-mınýtta «Sıbır» qatarynan Sheın Prıns esep aıyrmasyn qysqartty. Esep 4:2. Bizdiń jigitter 59-mınýtta qorytyndy esepti belgiledi. Ony Álıhan Ásetov soqty. Barys» «Sıbır» komandasynan 5:2 esebimen basym tústi. Osylaısha qatarynan úshinshi márte jeńiske jetti.
Astanalyq klýb budan buryn Astanada Fınlıandııanyń «Iokerıt» klýbyn 8:2 esebimen jeńse, odan keıin Ýfada jergilikti «Salavat ıÝlaevtan» overtaımda 3:2 esebimen basym tústi.
«Barys» endi Astanada eki oıyn ótkizedi. Aldymen 14 aqpanda Qytaıdyń «Kýnlýn Red Star» klýbymen muz aıdynǵa shyqsa, 16 aqpanda Ombynyń «Avangard» klýbtaryn qabyldaıdy.
