QHL: «Barys» qatarynan alty jeńisten keıin qarsylasyna ese jiberdi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasyndaǵy kezekti oıynynda Reseıdiń «Sıbır» (Novosibir) komandasyn qabyldady, dep habarlaıdy QazAqparat tilshisi.
«Barys» sońǵy alty oıynda qarsylastarynyń barlyǵynan basym tústi. Olardyń qatarynda kósh basynda kele jatqan Reseıdiń TsSKA komandasy da bar. Endi elordalyq klýbtyń tórt oıyny qaldy.
«Sıbır» pleı-off kezeńine joldama aldy. Qazir týrnır kestesinde 57 oıynnan keıin 68 upaı jınap, onynshy orynda tur. Al týrnır kestesinde altynshy orynda kele jatqan «Barystyń» enshisinde 58 oıynnan keıin 79 upaı bar. Olar da pleı-off kezeńine berilgen joldama taǵdyryn birneshe týr buryn sheship qoıǵan edi.
Soǵan qaramastan búgingi kezdesý tartysty ótti. Alǵashqy eki kezeńde qarsylastar bir-biriniń qaqpasynan sańylaý taba alǵan joq. Al 49-mınýtta «Sıbır» hokkeıshisi Egor Mılovzorov óz komandasyn alǵa shyǵarǵan edi. Oıynnyń bitýine nebári bes sekýnd qalǵanda «Barys» oıynshysy Lınýs Vıddel tarazy basyn teńestirdi. Oıyn overtaımǵa ulasty.
Kezdesýdiń 64-mınýtynda «Sıbır» hokkeıshisi jeńis shaıbasyn soǵyp ketti. Elordalyq klýb qarsylasynan 1:2 esebimen jeńilip qaldy. Nátıjesinde «Barystyń» alty oıynǵa sozylǵan jeńis serııasy osymen toqtady.
Eske sala ketsek, «Barys» buǵan deıin elordada Reseıdiń «Sochı» komandasynan 3:2 esebimen basym túsken edi.
