QHL: «Barys» elordada «Sochı» komandasynan basym tústi
NUR-SULTAN. QazAqparat - Búgin elordalyq «Barys» qurlyqtyq hokkeı lıgasynda Reseıdiń «Sochı» komandasymen kezdesti, dep habarlaıdy QazAqparat tilshisi.
Nur-Sultanda ótken oıynda «Barys» hokkeıshileri basym boldy. Kezdesý barysynda shabýyl shebinde kóp kózge tústi.
Buǵan deıin eki komanda 11 ret kezdesti. Onyń jeteýinde elordalyq klýbtyń mereıi ústem boldy. Bıylǵy dodada «Barys» atalmysh qarsylasynan syrt aıdynda 4:1 esebimen basym túsken bolatyn.
Bıyl «Sochı» sátsiz oıyn kórsetýde. Qazir 56 matchtan keıin 55 upaı jınap, jalpy týrnır kestesinde 18 orynda keledi. Ázirge pleı-off kezeńine joldama alǵan joq. Al «Barys» pleı-off kezeńine shyǵý múmkindigine birneshe týr buryn qol jetkizip qoıǵan bolatyn.
«Barys» sapynan 18-mınýtta Anton Sagadeev mergendigimen kózge tústi. Al 21-mınýtta Kertıs Valk esepti ústemeledi. Budan keıin de aıdyn ıeleriniń gol soǵatyn múmkindigi bolǵan edi. Dese de kelesi goldy «Sochı» sapynan Sergeı Shmelev óziniń enshisine jazdy. Al 48-mınýtta onyń áriptesi Malte Stremvall tarazy basyn teńestirdi. Jeńis shaıbasyn 52-mınýtta elordalyq Dmıtrıı Shevchenko soqty. Osylaısha «Barys» qarsylasynan 3:2 esebimen basym tústi. Olar alty oıyn qatarynan jeńiske jetip otyr.
Budan buryn «Barys» kósh basynda kele jatqan Reseıdiń TsSKA komandasynan basym túsken edi.
Endi «Barys» elordada eki kezdesý ótkizedi. Aldymen 18 aqpanda «Sıbır» (Novosibir) komandasymen kezdesse, 21 aqpanda «Salavat ıÝlaev» (Ýfa) klýbymen sheberlik baıqasady.
